Kasatkina lakah Kerber a tlawm

BNP Paribas Open champion tura rinkai Angelique Kerber chu Daria Kasatkina hneh loin a tla. Kasatkina hian minute 58 chhung lekin 6-0, 6-2 a hnehna changin, harsatna nei loin semifinal a lut.

World number 19 Kasatkina hi tun Indian Wells bikah chuan player hmuhnawm a ni mek. Kerber hma hian US Open champion Sloane Stephens leh world number 2 Caroline Wozniacki te a hneh tawh bawk.

Kum 20 mi Kasatkina chuan, "Kan point en chuan awlsam taka chak angin ka lang mai thei. Mahse, a ni ngawt bik lo. Kerber hi Grand Slam champion tawh a ni a, a thiamin thahrui a ngah hle bawk, ani ka paltlang thei hi ka vannei," tiin a sawi. Kasatkina hian final lut tur chuan Venus Williams a paltlang leh a ngai dawn a ni.

Quarterfinal inkhel dangah Grand Slam vawi sarih champion tawh Venus hian Carla Suarez Navarro chu 6-3, 6-2 in a hneh. Kum 37 mi Venus hi semifinal lut thei zinga upa ber a ni.

Inkhel dangah world number 1 Simona Halep chuan Petra Martic lakah fiahna hautak a paltlang. Romanian nula hian darkar hnih leh minute 23 an inkhelh hnuah 6-4, 6-7 (5-7), 6-3 in hnehna a chang hram.

Halep hian Naomi Osaka a tum leh ang. Japanese world number 44 hian Karolina Pliskova chu 6-2 6-3 in a lo hneh ve thung a ni. Halep leh Osaka te hi vawi thum an intawng tawh a, Halep hian hnehna a chang vek. An inkhelh hnuhnung ber chu Australian Open kha niin Romanian nula hi 6-3, 6-2 in a ding chang.