Thla tharah Iniesta hma hun chiang dawn

Chinese Super League nena sawizawm hlawh mek Barcelona captain Andres Iniesta chuan Chinese club aṭanga sawmna a hmuh chu a tih hlawhtlin dawn leh dawn loh thla tharah a chian tur thu a sawi.

Kum 33 mi Iniesta hian Champions League last 16 aṭanga Chelsea an hnawhchhuah hnu lawkah a hma hun a chian loh thu a sawi a, Chinese Super League club Tianjin Quanjian nen sawizawm mek an ni. Tianjin hian Spanish midfielder an rim loh thu erawh an sawi a, thuthang thehdarhtu chu court-a kalah an vau hial.

Barcelona captain chuan, "April 30 hmain Barcelona-ah ka cham zel dawn nge China-ah ka kal dawn tih chu ka tichiang ang. Ka tana ṭha ber tur ka ngaihtuah a ṭul a ni," tiin a sawi.

Spain international hian Barcelona-ah damchhung atan contract a nei a, Catalan club hi Champions League (4) leh La Liga (8)-ah a champion pui tawh.

Barca coach Ernesto Valverde chuan, "Tun dinhmunah chuan Barca hi Andres Iniesta telna a nih avangin Iniesta tel lohna Barcelona ka ngaihtuah lo," a ti a, a captain hma hun chungchangah ṭawngkam a nei duh lo.