Milan sawptu Arsenal an tlang

European champion vawi sarih ni tawh AC Milan hnehin Arsenal chuan Europa League quarterfinal an lut a, Spanish club ṭha Atletico Madrid pawhin Lokomotiv Moscow sawp chungin a thiam pariat zingah an hming an thai lang ve bawk.

Ningani zan inkhelah Arsenal hian an mikhual Milan chu 3-1 in an hneh a, kar hmasa khan San Siro-ah si hnih faia hnena an chan tawh bawk avangin inkhel pahnih belhkhawmah 5-1 in an tlang.

Welbeck-a goal hnih
Emirates Stadium-a inkhelah mikhual tan Hakan Calhanoglu-a'n minute 35-naah yard 30-a hla aṭangin a hlap lut, Milan midfielder hian chuh buaitu a neih loh avangin a duh tawkin goal kilah a pet thei.

Arsenal lamin rang takin an chhanglet nghal, Ricardo Rodriguez-a'n Danny Welbeck a tih tluk vangin penalty a chawi.

Milan defender hian Welbeck a pawt fuh chiah lo niin lang mah se penalty pek an ni. England tana kohna dawng hlim Welbeck-a'n goal a chantirin goal an chhuah aṭanga minute li hnu lekah an si phurh a sut nghal.

Tun hnaia club lian dangin lakluh an duh tak Milan keeper Gianluigi Donnarumma chuan Granit Xhaka ball pet a dan sual avangin goal-ah a lut tlang a, hun tawp dawnah Welbeck chuan an goal thumna a tauh lut bawk.

Gunners hian kum 2010 hnua a vawi khat nan European football-ah quarterfinal an lut ve leh chiah.

Wenger a lawm
Penalty an chawi danah Milan an lungawi lo a, goal khat faia hma an hruai laia thil thleng a nih avangin Italian club tan thil duhawm lo tak a ni. Chutihrualin Arsene Wenger chuan a striker chu a tlu der lo niin a sawi ve thung.

Gunners manager Wenger chuan, "Video ka en nawn leh hma chuan Danny Welbeck kha tlu der tiin ka puh ngawt thei lo. Milan player an lungawi loh dan en kha chuan kan penalty hlawh danah kan vannei deuh pawh a ni mai thei," a ti.

Hmasawnna an neih vanga a lawm thu sawi zuiin Wenger chuan, "Hun harsa tak hnuah hnehna kan chang chho ve leh ta, kan team hian theihna kan nei a, inkhel harsa taka hnehna kan chang thei hi a lawmawm hle," tiin a sawi.

Arsenal hi FA Cup aṭangin an tla tawh a, Premier League table-ah parukna ni mekin palina aiin point 12 zetin an hniam zawk. Season thara Champions League khelh theihna kawng ṭha chu Europa League nomawi chawi hi a ni.

Milan tan a na
Kum 10 liam ta kha chuan AC Milan hian Champions League title an kawl, mah se hmasawn lam aia hniam lam an pan avangin an hnungtawlh nasa hman hle. Chinese sumdawng hausa kuta an luh hnuah indin thar leh an tum mek a, nipui bazar hun lai kan player lakluh nan pound maktaduai 201.5 zet an hmang.

Milan hian tun hnaiah an midfielder hlui Gennaro Gattuso kaihhruaina hnuaiah hma pawh an sawn hle. Mahse, league lamah Juventus, AS Roma, Napoli, Lazio leh Inter Milan te an tluk lo–an beisei lian ber Europa League aṭangin an tla tawh. Juve nen Coppa Italia final an la khel dawn thung.

Italian manager Gattuso chuan, "Referee chungchang sawi ka tum lo, English football hi a mawi ṭhin a, chumi zui zel chu ni maiin ka hria. Kan vanneih hun a la ni lo a ni, nakin lawkah kan tan hun ṭha a la inher chhuak ve ang," tiin a sawi.

Atletico chak chiang
Inkhel dangah Atletico Madrid chuan Lokomotiv Moscow 5-1 in an sawp. La Liga club tan Fernando Torres-a'n goal hnih a khung bakah Angel Correa, Saul Niguez leh Antoine Griezmann ten goal khat ṭheuh an khung a, aggregate-ah 8-1 in an tlang.

Diego Simeone-a tana chanchin lawmawm loh awmchhun chu hliam vanga Filipe Luis lak chhuah ngai kha a ni ang. Atletico hian Europa League nomawi hi vawi hnih an chawi tawh a, Argentine manager hian 2014 leh 2016 khan a naute hi Champions League final hruai thleng mah se an chak lo thung.

Champions League aṭanga an tlak hnua Europa League khel zui Borussia Dortmund chu Salzburg lakah 2-1 a chak loin an zinkawng a tawp.

Arsenal, Atletico Madrid, CSKA Moscow, Lazio, Marseille, RB Leipzig, RB Salzburg leh Sporting Lisbon ten quarterfinal an khel ang.