India-in final lut

Nidahas Trophy tri-series khelh mekah India chuan an league match hnuhnung berah Bangladesh chu run 17-in an hneh a, final an lut.

Colombo khawpuia inkhelah India an bat hmasa zawk a, tun tournament-a beisei phak lo Rohit Sharma-a'n a thiam a la theihnghilh lo tih pholangin ball 61 lekah run 89 a vaw chhuak.

India captain hi Shikhar Dhawan (35 runs) leh Suresh Raina (47) ten an pui ṭha viau bawk. Men in Blue-in over 20-ah run 176 an tlin a, wicket thum an hloh.

Bangladesh bat hun a thleng a, run 72 siama a tawp thleng dam Mushfiqur Rahim rawn che ṭha viau mah se a ṭhianten an puih ṭhat tawk loh avangin over 20-ah an target an umpha hman lo. Bangladesh hian over 20 chhungin run 159 an tlin a, wicket ruk an hloh.

Tigers (Bangladesh sawina) hian nizan khan Sri Lanka an hmachhawn lehnghal a, he inkhela chak zawk zawk hian Pathianni zan dar 7:00-ah final khel turin India an hmachhawn dawn a, he thu buatsaih lai hian an result kan hre hman lo.