I League-in ISL an ngam

India rama league pahnih I League leh Indian Super League club-te inelna Indian Super Cup qualifier chu Ningani zan khan khelh ṭan a ni a, zan hmasa berah I League club pahnihin ISL club an ngam nghal.

Inkhel hmasa zawkah Churchill Brothers chuan rin loh takin Delhi Dynamos chu 2-1 in an hneh a, East Bengal duh loh Willis Plaza chuan goal hnih khungin ISL club a barakhaih.

Ningani zan inkhel hnuhnung zawkah NorthEast United chu Gokulam Kerala hmaah an mualpho bawk a, I League club tan Henry Kisekka chuan goal hnih a khung.

Thil mak a ni lo
Delhi leh Churchill inkhelah ISL club chu chak tur chiang zawka dah an ni a, minute rukna lekah Nigeria tana vawi 36 inlan thei Kalu Uche chuan Dynamos tan goal a khung nghal–result a chiang nghala ngaih a ni.

Mahse, Goan club-in Plaza hmanga minute 34-naa an si phurh an sut hnuah defensive game an khel a, extra time khelh niin minute 106-naah Trinidad and Tobago international hian chakna goal a khung. Delhi tan Lallianzuala Chhangte-in chance vawi hnih nei mah se a chhawr lo.

Churchill Brothers coach Alfred Fernandes chuan an result chu thil mak a nih loh thu sawiin, "Kan result hi a mak lo. Delhi Dynamos hi team ṭha tak an ni a, chutihrualin keini pawh sulhnu ropui tak nei club kan ni," tiin ISL club aia hniamah a indah duh lo.

Chak duh Gokulam
Ningani zan inkhel hnuhnung zawkah NorthEast United-in Lalrindika Ralte hmangin goal hmahruai an khungah ngai hman mah se Lunglei tlangval goal khung hi offside vangin pawm a ni lo a, Gokulam tana Henry Kisekka goal hnih khung chu Highlanders-in a chhanletna tur an nei thei lo.

NorthEast coach Avram Grant chuan, "Hnehna chan duh zawk team-in hnehna an chang a, keini aiin chak duhna thinlung an pu zawk a ni. Ka ngaihdan dik tak ka sawi dawn a nih chuan keini aiin chak an phu zawk," a ti.

Gokulam coach Bino George chuan, "Ka player tam zawk hi college football bak khel ngai lo an ni a, I League-a in zir mek player an ni," tiin team chhe zawk nichunga hnehna an chan thu a sawi.

Hmabak
Churchill Brothers-in last 16-ah Mohun Bagan an hmachhawn ang a, Gokulam hian Bengaluru an hmachhawn dawn thung.

Kerala boss George chuan, "Bengaluru hian pawisa tam tak nen squad an din tih ka hria a, tun dinhmunah chuan India-a club ṭha ber an ni. Mahse, ka naute hian tumah an hlau lo a, kan hmaa ding chu tupawh ni se kan theihtawp kan chhuah ang," tiin a sawi.

Nizanah inkhel pahnih a awm bawk a, he thu buatsaih lai hian result kan hre hman lo.