US Open-ah Andy Murray kan mangṭha nghal

Beiseina han nei thar leh ṭhin mah se a tak ram a chang hleithei tak tak ta lo - Andy Murray chu US Open 2021-ah hneh nei loin a tla. Nimin zing khan world number 3 Stefanos Tsitsipas lakah Murray hi a chak lo a ni.

Flushing Meadows, New York-a inelna neihah beisei aiin Murray-a'n bul a ṭan fuh. Set hmasa ber a la, set thum an khelh chinah set hnih a lak theih avangin rin hlawh zawk a vaw tla ngei dawn niin a lang hman, mahse set hnuhnung pahnihah Tsitsipas a rawn tho chhuak.

Mangṭha Andy
US Open ṭan hma khan kuminah Murray hian match 12 chauh a khel, season thum chhung chu khel bawr hliam vangin a buai ta. Tun hma lama a champion tawhna a nih avngin US Open lamin duhsak takin wildcard an pe a, match hmasa lamah player ṭha a hmachhawn a ngai.

Arthur Ashe Stadium-a inkhel entuten Murray an au phur nasa a, tun hma lama a tharum leh ball vuak na tak ang nei hlei thei lo mah se a ṭang rei thei viau, darkar li leh minute 49 zet an khelh hnuah erawh tlangval tha ṭha zawk Tsitsipas a ding chang.

Kum 23 mi Tsitsipas chuan, "A awlsam lo ngei mai, hnehna ka chan let theih nan khan ka theihna zawng zawng ka hlan. Mipui thawm a ṭha em em a, inkhel boruak sang leh nuam tak a ni. Inelna ka hmachhawn ve tawhah chuan New York hi fans an ṭhatna hmun a ni," tiin a sawi.

Inelna neih hma khan Murray chuan training a neih ṭhat thu a sawi; Wimbledon hunlai ai chuan a taksa pawh a fit thu a sawi, a inkhel lai en chuan training a nei ṭha tih chu a takin a lang, hun rei tak chhung 100% fit a nih loh avang erawh chuan atan harsatna tam tak a awm.

Set hnuhnung ber an khelh hmain Tsitsipas-a'n minute riat chhung ngawt 'bathroom break' a nei a, world number 1 hlui Murray chuan hei hi a sawisel a, tih luih niah a ngai - Greek tlangval erawhin dan ang thlapa thil ti a nih thu a sawi ve thung.

Match 200 chak thei
Daniil Medvedev chu tennis a khelh hun chhungin match 200 a chak tling ta, mellung pawimawh tak phun tur hian Richard Gasquet chu 6-4, 6-3, 6-1 in a hneh a, hnehna chang tur hian darkar hnih pawh a hmang ting lo hial.

Russian tlangval hi kumin tir lam aṭangin khan world number 3 a ni phak - kum 10 chuang hnuah Roger Federer, Rafael Nadal, Murray leh Djokovic ni lo player dang number 2 ni thei hmasa a ni a, tuna inelna neih laiah pawh champion tura rinkai a ni.

Kum 25 mi Medvedev chuan, "New York khawpuiah hian thawnthu hrang hrang ka lo nei tawh, a ṭhen chu ngaihnawm tak tak a nih laiin a ṭhen erawh lungchhiat thlak a ni thung, kuminah hian a ngaihnawm lam ziah belh ka tum," a ti.

US Open 2019 final-ah khan Medvedev hi Nadal nen an inhmachhawn a, mahse a vanduai zawkah a ṭang. Player ṭha tak ni mah se Grand Slam title a la hlawh chhuak lo tluang zel, hard court hi a inkhelh thiamna hmun a nih avangin beisei a nei sang.

Winners vawi 37 vaw chhuaktu Medvedev chuan, "Khua a lumin boruak a hnawng em em a, inkhel awlsam a ni lo. Point en mai chuan a awlsam hmel a ni mai thei, amaherawhchu a tak takah chuan harsa takin ka chak hram a ni," tiin a sawi.

Inkhel dang
Andrey Rublev chuan kum 42 mi Ivo Karlovic chu 6-3, 7-6 (7-3), 6-3 in a hneh a, Open Era china US Open main draw khel thei upa ber hi khel ṭha viau mah se Russian tlangval lakah a ṭang tlang zo lo.

Karlovic ang bawka Croatian player Marin Cilic pawh a zin kawng a tawp. 2014 US Open champion hi Philipp Kohlschreiber nen an inkhel tawk hle a, set ngana an khelh laiin game hnihin a hniam zawk a, hetihlai hian hliam vangin a khel zui thei ta lo a ni.

Cilic-a hian tun hma pawhin hliam chu a lo nei tawh ṭhin, mahse inkhelh laklawh laia inhnuhdawh erawh a la nei ngai lo. Tennis match 837 a khelh tawh chinah tun ṭum hi a tawp a thlen theih loh vawi khatna a ni hial.

Kevin Anderson-a'n a service neih ṭhat a lantir zel. South African star hian Jiri Vesely lakah vawi 49 zet aces vaw chhuak chungin 7-6 (7-1), 4-6, 3-6, 7-6 (7-5), 7-6 (7-4) in hnehna a chang a, darkar li leh minute 22 an khelh hnuah a chak.

Kum 2012 US Open finalist Anderson hian a match lehpekah chuan seeded 11-na Diego Schwartzman a hmachhawn leh ang. Inkhel dangah Casper Ruud leh Felix Auger-Aliassime te chuan an khingpui ve ve hnehin second round an lut ve bawk a ni.