India tana gold medal latu Sumit Antil

Tokyo Paralympic neih laiah Sumit Antil chuan India tan fei khawh (javelin throw) huangah gold medal a khawh chhuak. Pakhatna ni tur hian 68.55m zeta thui a khawh a, hnehna a chan bakah world record a siam nghal bawk.

India tlangval hnungah hian Australia aiawhtu Michal Burian (66.29m) leh Sri Lanka tlangval Dulan Kodithuwakku (65.61m) te an awm thung a, kawng engkimah Antil-a hi an phak lo.

Haryana tlangval Antil hian 2015 khan bike chesualah a ke vei lam a chan tawh, a khup a chin hnuai lam a bung - ke lem vuah a ngai a, a inlanna hi F64 category tih a ni a, ke lehlam nei tawh lo mah se a beidawn phah lo hle.

Paralympic fei khawhah hian vawi ruk an khawh thei a, chumi zinga a ṭha ber chu an la. Antil-a hian vawi nga a khawh aṭang hian 66.95m, 68.08m, 65.27m, 66.71m leh 68.55m a thui a khawh a, world record vek niin, a indawtin a khum chho vek.

Haryana chief minister Manohar Lal Khattarn chuan gold medal latu Antil hi Rs nuai 600 an pek tur thu a puang nghal a, thleng thlawh (discis throw) huanga silver medal latu Yogesh Kathuniya pawh Rs nuai 400 an pek tur thu a sawi bawk a ni.

India hian Paralympic 2020-ah medal pariat a la tawh a, a pumpuiah 29-na dinhmun a luah mek. Hmahruaitu China chuan medal 127 tehmeuh an hlawh chhuak tawh.