Arsenal leh William an inṭhen

"Zawi muangin hma kan sawn ang a, Champions League khel tura kan tlin hnuah European football inelna sang berah hian kan champion hial ang," tiin Mikel Arteta leh Willian ten duhthu an sam dun a, mahse an duhthusam chu boruakah a thamral ta.

Arsenal leh Willian chuan inhriatthiam tawnnain contract an ti tawp a, Brazilian winger hian an ram club Corinthians a zawm. A contract neih lai season hnih an tih tawp avang hian, kar khata £240,000 a hlawh chhutin Gunners hian pound maktaduai 20.5 an sen tur chu an sen a ngai dawn ta lo.

Kum 33 mi Willian chuan, "Duhsak taka min lo kuangkuahtu Arsenal chungah lawmthu ka sawi. Vanduai thlak takin kan duh leh beisei anga thil a thleng lo erawh a pawi ka ti. Mi tam tak hnen aṭangin sawiselna leh duhkhawp lohna thu ka dawng nasa, tuna ka dinhmun hian engkim a sawifiah ka ring.

"Ka chunga thil thlen dan hian min seltute chu zirtirna a pek ka beisei," a ti. Sum chauh ngaihtuah leh Arsenal tana ṭhahnem ngai tawk loa an sawisel ṭhinna chu Willian hian a nih lohzia a takin a lantir a ni.

Willian hian 2020 August thla khan Chelsea aṭangin Arsenal hi a zawm, season thum daih contract ziakin a lakah beiseina an nei sang hle. Mahse, beisei ang erawh a ni lo, season hmasa khan Premier League match 25 a khelh aṭangin goal khat chauh a khung.

Brazil tana match 70 khel tawhtu Willian chuan, "Football ka khelh hun chhung hian a ṭha thei ang bera tih tum mi ka ni, vanduai thlak takin Arsenal-ah erawh chutiang chu a thleng lo, a pawi ka ti takzet," a ti a, hripui anga fans nen an inhmu tam tawk lo chu pawi a tih thu a sawi bawk.

Chelsea tana a khelh laiin Willian-a'n Premier League nomawi pahnih a chawi tawh a, Gunners tan hlawhtling ta lo mah se English football-ah sulhnu ṭha erawh a hnutchhiah tho - tunah chuan a chawr chhuahna Corinthians tan tha a thawh leh dawn ta a ni.