Covid-19 leh World Cup khel tur zawnna
FIFA World Cup 2022 chu November 21 aṭanga December 18, 2022 hian Qatar-ah khelh a ni dawn a, Covid-19 chuan khawvel football inelna lian ber khelh tur zawnnaah nghawng a nei lian hle.
Hripui leng vangin March thlaa qualifier match hnih khelh tur chu khelh a ni lo a, September leh October thlaah khelh tel a ni dawn. FIFA chuan hemi a nih avang hian international break chu ni hnihin a pawtsei a, Covid-19 hri vanga sorkar lamin quarantine dan khawng tak a neih bawk avangin club football inelnaah nghawng lian tak a nei ang.
FIFA an chak
FIFA-in international break ni hnih atana a pawhsei avangin Spanish LaLiga chu infiamnaa thuneitu sang ber Court of Arbitration for Sport (CAS)-ah an zualko. CAS hian uluk taka a ngaihtuah hnuin FIFA thutlukna hi a pawmpui a, La Liga khinna hi a hnawl.
FIFA president Gianni Infantino chuan ram, league leh club hruaitute inpumkhat taka an thawhho theih nan zahngai turin a ngen a, club-te chu an player-te ram tana khelh phak tura an beisei thu a tarlang bawk.
A nghawng chu
Covid-19 tuar ber tur chu South American ramte leh club-te an ni a, an player ṭhate an chan ve ve dawn. Sorkar lamin hri leng vanga inkhuahkhirhna dan a thlah dul duh loh avangin 'red list' rama zinte chu ni 10 chhung an inkhung hran a ṭul dawn a, club ṭhenkhat chuan an player-te chhuahtir an tum lo.
Premier League leh La Liga chuan club-te thlawpin ram aiawha khel tura player-te chhuahtir loh an pawmpui. Chutihrualin FIFA-in hremna a lekkawh a nih erawh chuan international match hun chhung bakah ni nga chhung inkhel lo turin player-te hi a hrem thei a ni.
Aston Villa goalkeeper Emiliano Martínez leh midfielder Emi Buendia te chuan World Cup qualifier khel turin Argentina training an zawm tawh a, qualifier match hnih khelh tura a hmasa pahnih an khel dawn.
Chuti chung chuan Villa player pahnih Martinez leh Buendia te hi inkhung hran a ṭul dawn avangin September 11, Zirtawpnia Chelsea an hmachhawn hunah an inlan thei lo. Inkhung hran hunchhung hi ni 10 a nih dawn avangin Villa leh Everton te inkhelh hunah an inpeih hman ang em tih pawh hriatthiam har tak a ni.
Engtin zel?
Premier League leh La Liga-in player chhuah lo tura thutlukna an siam avangin Brazil-in player an koh belh hial. Team coordinator Juninho Paulista chuan, "World Cup qualifier a ni a, a pawimawh em avangin Europe club-te thutlukna nghak reng thei kan ni lo," tiin a sawi.
Brazil koh thar player-te hi goalkeeper pahnih Everson leh Santos, defender Miranda, midfielder pathum Edenilson, Gerson leh Matheus Nunes bakah forward pathum Hulk, Malcom leh Vinicius Jr te an ni.
Manchester United erawh an vannei a, Uruguayan Football Association-in Edinson Cavani an kohna an sut avangin an player pawimawh hi harsatna nei loin an chhawr chhunzawm thei ang.
Premier League hmahruai mektu Tottenham erawhin Giovani Lo Celso leh Cristian Romero te an chan a, Argentine duo hian London club match thum an khel thei dawn lo.
Argentina erawh Covid-19 buaina karah an player-te an kim ṭha a, nimin thleng khan PSG player pathum Lionel Messi, Angel Di Maria leh Leandro Paredes tih lo chu an kim vek. PSG player-te pawh hi match an khelh tlaia training zawm tlai chauh an ni a, Argentina team zawm ngei tura ngaih an ni.