Zanin Ronaldo inlan hun

Cristiano Ronaldo chu Juventus chhuahsana Manchester United a zawm hnuah zanin hian khelmualah a inlan dawn a, Red Devils tan ni loin an ram Portugal tan a inkhel ang. Fernando Santos hote hian zanin dar 12:15 hian Estádio Algarve-ah Republic of Ireland an mikhual dawn.

Kum 36 mi Ronaldo chuan, "Ram tana khel tura haw hi inchhuanna tham a tling a, ram aiawha khelh hi a hlu a ni," tiin a sawi a, Republic of Ireland pawh hi a hmachhawn ngei turah a ngaih theih.

Juventus pawhin Ronaldo chungchangah thuchhuah an siam a, Italian club pawh hian Manchester United nena an inremna pawh an tarlang. Ronaldo man hi euro maktaduai 15 a ni dawn a, kum nga chhungin English club-in an pe tla ang. Portugal captain hi a chet ṭhat dan a zirin Man United hian Italian club hi euro maktaduai riat an pek belh thei bawk.

Man United pawisa pek tlak hun chhung hi kum nga daih ni mah se a contract sei zawng erawh kum hnih a ni dawn a, kum khat pawhsei theih dan a awm. English club hian Ronaldo an chhawr theih nan hian an player an hralh ṭhen a ṭul a, Daniel James-a'n Old Trafford a chhuahsan dawn tih chu a chiang tawh.

Euro 2020-ah khan Ronaldo hian goal nga a khung a, ram tana goal khung tam ber record Ali Daei siam goal 109 chu a nihrual. Portugal captain hian Republic of Ireland lama goal a khung thei a nih chuan record thar a siam dawn.

Portugal hian September 4, Inrinni zan dar 9:30-ah World Cup thlengtu tur Qatar nen friendly match an khel ang a, September 7, Thawhlehni zan dar 9:30-ah Azerbaijan nen an inkhel leh dawn. Match thum ngawt an inkhelh dawn avangin Ronaldo hi record siam ngei tura ngaih a ni.