Van Gaal-a hnuaiah Netherlands-in bul ṭan dawn
Zanin dar 12:15 hian Norway leh Netherlands te Ullevaal Stadion, Oslo-ah an inhmachhawn dawn. World Cup 2022 khel tur zawnna hi manager tawnhriat nei ṭha Louis van Gaal vangin ngaihven a hlawh. Manchester United manager hlui Van Gaal hian Dutch football hruaitu pawh ni se amah bak pan tur a hriat loh thu a sawi.
Pa ngaihnawm
Football tingaihnawmtu pakhat chu manager huaisen leh ṭawng huai a ni a, khelmual pawn inbeihna hi a ngaihnawm ṭhin. Tuna manager ṭanglaiah chuan Jose Mourinho hi a langsar a, kum 70 mi Van Gaal pawh hi 'pa ngaihnawm' huangah hian a tel ve chiang a ni.
Van Gaal hian kum 2000-02 khan Netherlands hi a enkawl tawh a, kum 2012-2014 chhung khan a vawi hnih nan a enkawl leh bawk. World Cup 2014-ah khan Netherlands hi FIFA World Cup-ah pathumna an ni pha hial.
Oranje hian Euro 2016 leh World Cup 2018 an khel pha lo a, Euro 2020 khel mah se Frank de Boer hoin last 16-ah an tla. Netherlands-in Qatar-a zin ngei an duh a, De Boer banin Van Gaal an lalut. Dutch manager Van Gaal chuan, "Keima tan ni loin Ducth football tan ka rawn pen chhuak. Dutch football tan theihtawp ka chhuah tawh ṭhin. Dutch Football Association-ah hian thuneitu pawh ni ila, kei lo chu thlan tur ka hre lo. Mak inti mai thei, mahse tun ang hunah hi chuan tawnhriat nei ṭha a pawimawh," tiin a sawi a, a inringtawk hle.
Van Gaal hian tawnhriat a nei ṭha ve reng reng; club football-ah pawh Ajax bakah Barcelona, Bayern Munich leh Manchester United te a enkawl tawh a, inchhuang tur chu a ni ve hrim hrim.
Oranje dinhmun
Euro 2020 hma khan Netherlands hian World Cup qualifier hi match thum an khel hman a, an match hmasa berah Turkey 4-2 in an hneh lo. Group khat aṭangin pakhatna an tling nghal dawn a, pahnihna tan pawh tlin theih dan a awm.
Europe hian quota 13 an nei a, ram 55 chu group 10-ah ṭhen darh niin group tina a sang ber ṭheuh an tling nghal dawn. Hmunruak pathum la awm chu group tina pahnihna bakah Nations League ti ṭha pahnih ten an zawng dawn a, team 12-in hmun ruak pathum an zawn dawn avangin 'group winner' ni chunga World Cup khel tura tlin hi kawng ṭha ber a ni.
Netherlands te group-ah hian Turkey, Montenegro, Norway, Latvia leh Gibraltar te an awm. Latvia leh Gibraltar te hi point thum hmuh ngeina turah ngaih theih an ni a, ram dang erawh an intluk tawk viau turah a ngaih theih.
Oranje hian khualmualah Norway an hmachhawn dawn a ni a, Turkey leh Latvia te nen an inkhelh lehnghal dawn avangin tun international break hi a pawimawh hle.
Inkhel tur chu
Netherlands hian coach thar an nei a ni ringawt lo a, Euro 2020-a inlan lo Virgil van Dijk a rawn kir leh tawh avangin team ṭha zawk an ni tih a chiang nghal. Tlarhma lama an chhuanvawr Memphis Depay pawhin Barcelona tan bul a ṭan ṭha a, Tottenham forward Steven Bergwijn te nen an goal bawh na viau tura ngaih a ni.
Chutihrualin Norway hi Erling Haaland-a telna a ni a, Borussia Dortmund striker hi danglamna thlen thei a ni. Amaherawhchu Norway hi Euro 2000 hnuah inelna lianah an tel leh lo a, Haaland hian ram aiawha inelna lian khelh a tum a nih chuan zaninah a chet ṭhat ngei a ṭul ang.