Bayern Munich-in Sabitzer an lalut

Bundesliga champion Bayern Munich chuan an elpui RB Leipzig captain Marcel Sabitzer an lalut a, Allianz Arena-ah kum li daih contract a ziak.

Kum 27 mi Sabitzer hian Leipzig tan kum sarih a khel tawh a, kum 2016 khan Bundesliga khel turin a tlinpui. Austrian midfielder hian Leipzig tan league match 177 khelin goal 40 a khung.

Bayern hian Sabitzer manah hian euro maktaduai 15 ($17.5 m) vel chauh an senga sawi a ni a, Julian Nagelsmann hnuaiah hmun pawimawh a chang pha lo a nih pawhin an elpui club player pawimawh an chhuhsak avangin transfer ṭha tak a ni hrim hrim.

Sabitzer chuan, "Ka naupan laiin Bayern jersey hi Krismas apiangin a thar ka nei ṭhin a, min tihlimtu a ni. Club tan ka theihna zawng zawng ka hlan ang," tiin a sawi a, nomawi ṭhahnem tak chawi a duh thu a sawi tel bawk.

Bavarians hian season liam taa anmahni hnaih bertu RB Leipzig aṭangin captain Sabitzer bakah manager Julian Nagelsmann leh defender Dayot Upamecano te an chhuhsak tawh. Bayern hian season kaw chhung league nomawi an chawi tawh a, an mit it zawng an hlah meuh loh avangin German football an thunun hi a mak hran lo.