Liverpool captain Hendo a cham dawn

Anfield chhuahsan tur ang hiala sawi thawm a awm hnuah Jordan Henderson a chhuak dawn lo tih a chiang a, Liverpool captain hian Merseyside club-ah kum li dang cham turin contract thar a ziak.

Liverpool-a kum 10 zet hun hmang tawh Henderson hian a contract neih lai ang chuan Reds-ah kum 2023 thleng cham turin contract a nei a, season hmasa zawh hnu khan club lamin contract thar ziak turin an dawr.

Mahse, Hendo hi kum 31 mi a nih ve tawh avangin Anfield thuneitu lamin rei tak chelh an tum lo a, hlawhah inrem mah se contract rei zawngah an inrem thei lo nia sawi a ni.

Hetihlai hian Hendo dinhmun chu Atletico Madrid leh Paris Saint-Germain lam pawhin an thlithlai ve reng nia sawi a ni a, Reds hi an Captain chhuanvawr chân thei dinhmunah an ding hman.

Mahse, Liverpool-in an Captain chân em chu an lo duh lo a, lungawi takin an inchelh thei ta - "He zinkawng ka zawh chhunzawm thei tur hi ka hlim takzet a ni," tiin Hendo chuan a sawi.

English midfielder chuan, "He hmun ka pan hnuah hian hma ka sawn nasa em em a, lawmthu hrilh tur tam tak ka nei. He club-a ka hun hman minute tin mai kha ka ngaihlu em em vek a, kan hun tawn thim takte pawh kha he club nena tawng kan nih avangin ka lawm em em tho.

"He club-a cham rei theih hi ka tan chuan duhthusam a ni a, ka lo sawi fo tawh angin a rei thei ang ber he hmunah hian cham ka duh a ni," a ti a, a contract hi a hmang zo a nih chuan kum 35 a ni ve tawh ang.

Hendo hian kum 2011 khan Sunderland aṭangin Liverpool hi a zawm a, match 394 a inlanah goal 30 khungin assist vawi 51 a nei a, nomawi chawi theih ang chu a chawi kim deuh thaw.

Kum 2012 khan Sir Kenny Dalglish hnuaiah Liverpool tana a nomawi hmasa ber chawi nghalin League Cup-ah an champion a, a captain-na hnuaiah Premier League, Champions League, UEFA Super Cup leh FIFA Club World Cup nomawi an chawi bawk.

Premier League club-te nipui transfer-ah player thar laluta an hmanhlelh viau laiin Liverpool erawh an player ṭha neihsate contract thar ziahpuiin hun an hmang a, Hendo hma hian Virgil van Dijk, Alisson, Fabinho, Trent Alexander-Arnold leh Andrew Robertson ten contract thar an ziak tawh.

Liverpool hian tun season-ah league match thum an khel tawh a, point sarih an nei - an match hnuhnung berah Chelsea chu 1-1 in an inhnehtawkpui a ni.