Leeds United player thar Dan James

Manchester United winger Daniel James chuan Leeds United chu an player man to ber ni turin a zawm dawn a, a man hi pound maktaduai 30 a ni ang - he thuziak i chhiar chuan contract engkim tih fel a ni tawh ang.

Kum 23 mi James hian kum 2019 khan Swansea City aṭangin Old Trafford hi a pan a, Manchester United tan inelna hrang hrangah match 74 khelin goal kua a khung a, assist vawi kua a nei bawk.

Manchester United chuan nipui transfer-ah an fapa rangkachak Cristiano Ronaldo an hruai kir a, Portuguese forward an laklet avang hian James-a dinhmun a nghing nghal - tunah chuan amah lo duh tawh ṭhintu Leeds lamah a kir dawn ta.

Leeds coach Marcelo Bielsa hian January 2019 khan Swansea aṭangin James hi lakluh a lo tum tawh a, mahse an hlawhtling lo. Season hmasa khan an ngaihven leh a, mahse, Brazilian forward Raphinha an la leh ta zawk.

Kum 2021 nipui transfer a inhawn leh meuh chuan Leeds-in hman aṭanga an duh tawh forward hi chân nawn an duh lo a, Elland Road lamah an seng lut ta.

Wales international hian season hmasa khan United tan inelna hrang hrangah match 26 khelin goal nga a khung a, assist vawi hnih a nei - Old Trafford-a a cham chhungin nomawi chawi a nei lo.