Juventus-ah Kean a kir

Everton striker Moise Kean chuan a puanthuah telin amah siam liantu Juventus lam a pan a, Serie A-ah hian season hnih chhung loan-in a khel ang.

Kum 21 mi forward hi Juventus hian a loan zawhah a khelh ṭhat dan a zirin euro maktaduai 28-in an lalut thei dawn a, hlawhtlinna an chan a zirin euro maktaduai thum dang pek belh leh tur a ni bawk.

Juventus-in an tarlan danin loan-a an hawh manah hian euro maktaduai sarih an seng a, tun season-ah euro maktaduai thum an pe phawt ang a, season tharah euro maktaduai li an pe leh ang.

Kean hian August 2019 khan Juve chhuahsanin Everton a zawm a, hetihlaia a man zat hi euro maktaduai 27.5 niin, a khelh ṭhat dan a zira euro maktaduai 2.5 dang pek belh theih tura tih a ni.

Mahse, Kean hi a beisei angin Everton-ah a hlawhtling lo. Season hmasa khan Paris Saint-Germain chuan loan-in an hawh a, French club tan hian match 41 khelin goal 17 ngawt a khung a, assist vawi khat a nei bawk.

Everton-ah erawh match 39 khelin goal li chiah a khung a, assist vawi hnih a nei. Juventus chuan, "A in ngeiah a lo kir a, hmangaih taka kuangkuah turin kan inpeih a ni," an ti.

Kean hian kum 10 mi lek a nih laiin Juventus hi a zawm a, kum 2016 khan kum 16 mi lek niin Italian club tana a match hmasa ber a khel a, kum 2019-a Everton a zawm hma khan Juve tan match 21 khelin goal riat a khung hman.

Goodison Park-a kum thum contract la nei Kean hi coach thar Rafael Benitez hnuaiah match hnih a inlan hman a, Carabao Cup second round-a Huddersfield an hnehna inkhela hnawhchhuah a nih kha Everton tana a inlan hnuhnung ber a ni rih.