Naomi Osaka a nui leh ta

US Open champion lai, Tokyo Olympic meichher chhi kaitu ni bawk Naomi Osaka chuan rilru lam harsatna a neih hnuah ngai a awh chho leh mek a, tunah chuan tennis court-ah ngei mai hlim taka a nui hmel hmuh tur a awm leh ta.

Nimin zing khan Osaka hian world number 87 Marie Bouzkova chu 6-4, 6-1 in a hneh a, harsa lo takin US Open second round a lut. A match lehpekah chuan world number 145 Olga Danilovic a hmachhawn leh ang.

Japanese nula Osaka hian a Grand Slam title hmasa ber ni turin 2018 khan US Open nomawi a chawi. Lawmna leh hlawhtlinna a chan rual hian rilru lam harsatna a nei tel a, a harsatna hi kumin tir lamah khan a lang chhuak zual.

French Open-ah media a hmachhawn duh lo a, pawisa chawitir a nih hnuah a inhnukdawk - Wimbledon a khel lo bawk. Tunah erawh media a hmachhawn duh lo kha a tihsual a nih thu a sawi a, boruak ṭha a tawng chhunzawm dawn niin a lang.

Grand Slam vawi li champion tawh Osaka chuan, "Season hmasa khan entu awm mumal loin kan khel a, court-ah khan mal ngawih ngawiha inhriat chang ka nei ṭhin. Tunah erawh min ti chaktu fans an awm leh ta, lawmna tur hlir a ni rih.

"Mipui lamin ka hming an lam rik lai kha ka hre reng a, chakna leh phurna nasa tak min pe. Hetianga hlimna leh lawmna hi hun rei tak chhung ka neih tawh loh kha a ni," tiin a sawi a, rilru lam harsatna a neih chuan a kian san zel.

Champion tura rinkai zinga mi Simona Halep pawhin hnehna a chang. Romanian star hian Italian player Camila Giorgi chu 6-4, 7-6 (7-3) in a hneh a, major title vawi thum la tawh Garbine Muguruza chuan 7-6 (7-4), 7-6 (7-5) in Donna Vekic a hneh ve bawk.

Hmeichhe singles inkhel dangah French Open champion Barbora Krejcikova, seeded pahnihna Aryna Sabalenka, 2017 US Open champion Sloane Stephens, Elina Svitolina, Victoria Azarenka leh tleirawl Coco Gauff te pawhin an khingpui ṭheuh an hneh ve bawk a ni.