Hammers-in Vlasic an lalut

Premier League club West Ham chuan Croatia midfielder Nikola Vlasic chu CSKA Moscow aṭangin an lalut a, a man atan pound maktaduai 26.8 an inseng - a khelh ṭhat dan a zirin pound maktaduai 7.7 an pek belh leh ang.

Kum 23 mi midfielder hian kum nga cham turin contract hi a ziak a, kum khat dang pawhsei theih tura tih a ni bawk - Vlasic hian Croatia tan match 26 a khel tawh a, Euro 2020 khelh zawh takah pawh khan match li lai a inlan.

Hajduk Split aṭanga a career ṭantu midfielder hi Premier League-ah a mikhual dawn lo. Kum 2018 khan Croatian club aṭang hian Everton a lo zawm tawh a, mahse, Merseyside club-ah beisei a phak loh hnuin CSKA Moscow lamah a pem.

Russia lamah a theihna tak tak pholangin season hmasa khan Russian Premier League Footballer of the Year-ah thlan a ni a, Hammers-in Russia ang thoin England-ah a chet ṭhat an beisei ang.

West Ham hian season hmasa lama loan hmanga an hawh Jesse Lingard chu Manchester United aṭanga a ngheta lakluh tumin an bei reng a, mahse, beisei anga an inrem lawk theih loh avangin Vlasic lam hi an hawi zui a ni.

United-a hmun chang phak lo Lingard hian January khan London club hi loan-in a zawm a, match 16-a khelhsakah goal kua ngawt a khung a, season a hmang ṭha hle.

Mahse, West Ham-in a ngheta lakluh an tumnaah an duhtawk a, Vlasic an la. Croatian midfielder hian CSKA Moscow-ah match 108 khelin goal 33 a khung a, assist vawi 21 a nei bawk.