Bakayoko-a'n Milan a zawm

Chelsea midfielder Tiemoue Bakayoko chuan AC Milan chu season hnih chhung loan-a khel turin a zawm a, Serie A-ah a tlangnel tawh sa avangin a tan thil thar a ni lo.

Kum 27 mi Bakayoko hian AS Monaco tan 2016-17 season khan Ligue 1 nomawi a chawi a, European club lian tam tak chil a tiput.

July 2017 khan club tam tak sawmna hnarin Chelsea zawm a thlang a, London club-ah hian kum nga chhung atan contract a ziak a, a man ringawt pawh pound maktaduai 40 a tling.

Chelsea-a a season hmasa berah hian match 43 khela goal thum khungin assist vawi thum a nei a, London club-ah beisei a phak loh avangin Milan-ah hian kum khat chhung loan-a khelhtir a lo ni tawh.

Hetihlai hian Milan hian lona-a hawh manah euro maktaduai nga an seng a, season tawpah an duh chuan euro maktaduai 35-a a ngheta lakluh theihna dan a awm tel.

Mahse, Milan-in a nghetin an lalut duh lo a, a club hlui Monaco lamah a kir. French club-ah pawh hian season tawpah a ngheta lakluh theihna dan ziah tel a ni a, euro maktaduai 42.5 a ni.

Monaco-in an player hlui an chelh zui lo a, Napoli lamah loan bawkin kaltir a ni. Napoli-ah season khat a khelh hnuin AC Milan-ah bawk a kir leh ta a, Italian club hian a loan hun a hman zawh hunah a ngheta lei theihna dan an nei tel.

AC Milan hian Chelsea aṭangin Fikayo Tomori leh Olivier Giroud an lalut tawh bawk a, Bakayoko hi Serie A club-ah a mikhual dawn lo.

Stefano Pioli enkawlna hnuaia khel Milan hian league match hnih an khelh tawhah hnehna an la chang ve ve a, an lamah goal khat chiah la lutin goal nga an khung tawh thung.

Milan hian hun rei tak hnuah Champions League an khel ve leh dawn ta bawk a, mahse, group B-ah Atletico Madrid, Liverpool leh FC Porto te nen an awmho dawn avangin a awlsam lo ang.