Real-in rawlthar duhawm Camavinga an chang

European football-a rawlthar beiseiawm ber pawl Eduardo Camavinga chuan Real Madrid zawm turin thutlukna a siam fel a, he thu buatsaih lai hian official-a puanzar chiah chu hmabak a ni tawh.

Kum 18 mi midfielder hian Real Madrid hi Ligue 1 club Rennes aṭangin a zawm a, khawthlang media-ten an tarlan dan chuan June 2026 thleng atan contract hi a ziak a, Manchester United leh Paris Saint-Germain pawhin sawm mah se Real hi a thlang a ni.

Man leh mual
Kum 18 lek ni chunga France tan match thum inlana goal khat khung thei Camavinga manah hian Real-in euro maktaduai 30 an pe niin journalist lar Fabrizio Romano chuan a tarlang a, a khelh ṭhat dan a zirin a man hi sang leh thei a ni bawk.

Camavinga hi a kum a la nau deuh bawk avangin a club khelhna Rennes lamah season khat dang chu loan-a cham leh tur anga sawi a awm a, mahse, Romano chuan Carlo Ancelotti-a'n chhawr nghal a duh avangin Santiago Bernabeu a pan nghal tur thu a sawi.

Rawlthar sulhnu
Rennes academy aṭanga inzir chhuak Camavinga hian December 14, 2018 khan a professional contract hmasa ber a ziak ve chauh a, hetihlai hian kum 16 leh thla khat mi niin Rennes tana professional contract ziak thei naupang ber record a siam.

April 2019 khan Angers nen 3-3 a an inhnehtawkna inkhelah Ligue 1-a a match hmasa ber a khel a, kum 16 leh thla li mi niin Rennes tana inlan thei naupang ber a ni - French club tan hian inelna hrang hrangah match 88 khelin goal hnih a khung a, assist vawi nga a nei.