Indian Super League champion Chennaiyin

Star Sports a ni a, Indian Super League final pek chhuahna sports channel hi khawvel hmun hrang hrang aṭangin mi maktaduai telin an thlir. "Mizoram aṭanga minlo thlirtu zawng zawngte, in zavai chungah lawmthu ka sawi e," tiin Mizo ṭawng a rawn ri chhuak a, Mizo tlangval Jeje Lalpekhlua thusawi a ni.

Jeje Lalpekhlua leh Jerry Lalrinzuala khelhna Chennaiyin FC chuan Inrinni zan khan ISL final-ah 3-2 in Bengaluru FC an hneh a, India rama football inelna ngaihhlut hlawh berah an champion.

Mizo tlangval Jeje-a'n goal khung lo mah se an goal thumna Raphael Augusto khung tur chu duhthusama ṭhain a siamsak a, Jerry-a'n game pawimawhah 'pressure' a zo tih pholangin Emerging Player of the Match-ah thlan a ni bawk.

Inkhel hmuhnawm
Sree Kanteerava Stadium, Bengaluru-ah final khelh a ni a, mipui 25753 an pungkhawm - mipui tam zawkin Bengaluru an ṭan a, minute kuana lekah an duh an hmu nghal. Udanta Singh-a'n mual ding lam sir aṭanga ball a cross phei chu Sunil Chhetri-a'n ṭha zetin a tauh lut a, India captain ngaihtuahna leh chet ranna chu fak tlak a ni.

Blues hlim chhung erawh a rei lo. Minute riat a liam a, Gregory Nelson corner aṭanga ball kal chu midang zawng aia zuang sang Mailson Alves-a'n ṭha zetin a tauh lut. Bengaluru-in goal khung ngei tumin nawr zawn chhunzawm mah se Dimas Delgado-a'n chance ṭha a hloh hnua goal khungtu chu Chennai club bawk an ni a, a khungtu pawh Alves bawk a ni. Brazilian defender hian a vawi hnih nan corner aṭangin a tauh lut.

Chawlhlawk hman a nih hnuah pawh Bengaluru aiin Chennaiyin an khel ṭha chhunzawm a, minute 67-naah an goal thumna an hlawh chhuak. Jeje-a'n goal-ah a pet tawh dawn nia a lan hnuah hmasial lo takin Augusto tan a siamsak a, Brazilian midfielder hian an goal thumna ni turin 'cool' zetin a khung.

Team vanduai BFC
Bengaluru-in point 40 hmua league hmahruaitu ni chungin ISL final an lut a, mahse league-a an khelmuala an ngam loh hnu Chennaiyin bawk an ngam lo nawn. Bangalore club tan Chhetri-a'n goal hmahruai a khung bakah hun pek belhah Miku chuan ṭha zetin a tauh lut a, harhchhuah nan erawh a tlai tawh.

Chhetri-a'n goal khung mah se hun tawp hnaih lamah goal 'ruak' ah a khung thei lo a, hnai set sawt aṭanga a tauh Karanjit Singh-a'n ṭha zeta a dan sak te chu uiawm tak a ni. Bengaluru tan Udanta goal khung chu offside vangin pawm sak a ni lo a, Inigo Calderon-a'n Nishu Kumar a tih tluk vangin Blues hian penalty beisei mah se pek an ni lo bawk.

Replay thlirin Udanta a offside tih a chiang a, Calderon-a'n Nishu a tih tlukah thutlukna pahnih awm thei niin a lang bawk. Bengaluru coach Albert Roca erawhin chhuanlam a zawng lo.

Spanish coach hian rin loh takin 3-4-3 formation a hmang a, hemi chungchang hi sawi langin Roca chuan, "Formation-ah khan tihsual ka nei tih ka hria. Player leh coach-in mawhphurhna kan nei ve ve a, tun ṭum chu keima thiam loh a ni," tiin a sawi.

Final - Lawmman
Limitless Player Raphael Augusto, Chennaiyin
Winning Pass of the Match Gregory Nelson, Chennaiyin
Fittest Player Sunil Chhetri, Bengaluru FC
Emerging Player Jerry Lalrinzuala, Chennaiyin
Hero of the Match Mailson Alves, Chennaiyin