Vanglaini Biangbiakna : Champion kan inring sa - Jeje

Jeje Lalpekhlua'n nomawi lian tham pasarih I League (1), Federation Cup (1), Indian Super League (2) leh SAFF Cup (3) a chawi tawh a, tun season-ah pawh ISL nomawi chawi a inrin sa thu a sawi.

Hnahthial tlangval chuan, "Season ṭan tirh aṭanga kan tum ber chu champion a ni a, kan champion avangin a nuam takzet. Season dang angin player langsar nei lo mah ila kan squad a chhah tawk a, champion turin kan ṭha tawk tih hi a tir aṭangin ka hria," a ti.

Jeje chuan final thlir kirin, "Bengaluru defender te kha feet ruk chuang vek an ni a, coach ruahmannaah tlar hmaah ka maltlat bawk si. Ball kanga khelh kha kan ruahmanna a nih bawk avangin a harsa takzet a, mahse zawi zawia insiam remin hnehna kan chang a ni," tiin a sawi.

Mizo tlangval chuan, "Sawi tawh angin coach-in min ring tawk a, striker maltlat rinrawl ka nih avangin pressure a sang bawk. Goal kua aia tam zawk khung thei ka ni a, mimal bikah chuan duhthusam season tih tur a ni lo," tiin India ram striker langsar hian hmasawnna tur a la neiah a inngai.

Jeje chuan Mizo mipuite chungah lawmthu sawiin, "Kan inkhelh hma aṭangin phone call leh message tam tak ka dawng a, Mizo mipuiten min ṭawngṭaipui nasa em em bawk. An chungah ka lawm takzet a ni," a ti a, a tana ṭawngṭaite a theihnghilh lo.

India rinrawl nih ka tum - Jerry
Jerry Lalrinzuala'n Indian football-ah a season hnihna a hmang ve chauh a, ISL nomawi a chawi nghal. Mizo rawlthar Jerry chuan, "Hmabak tam tak ka la nei a, India rinrawl ni thei turin ka bei dawn a ni," tiin chawlh mai a la tum lo.

Bethlehem Veng rawlthar chuan, "Cham-pion nih ka beisei lo. Mahse, kan thawkrim em em a, kan thawhrim rah kan hmu a ni. Ka season hnihna chauh ni mah se mahni inrintawkna ka ngah tawh a, coach-in min rintawk bawk avangin a nuam a, ka season hman danah ka lawm thawkhat viau," a ti.

Mizoram sub junior team aṭanga inzir chho Jerry hian match 21 awmah match 20 a khel a, Emerging Player of the match-ah vawi riat thlan niin Hero of the Match-ah vawi khat thlan a ni. ISL-a a season hmasa bera Emerging Player of the League ni nghal thei defender hian India tan match thum a khel tawh.