Salah zûnzam a leng vel Salah 4; Firmino 1–Watford 0

19th March, 2018

Mohamed Salah hming lam a bang thei lo - Egyptian forward hian Inrinni zan khan Watford lakah goal li a khung a, Liverpool chu an mikhual lakah hian 5-0 in hnehna a chanpui.

Liverpool goal nga khungah Salah a inrawlh vek. Roberto Firmino-a'n Reds tan goal khat a thawh ve a, hei hi Salah siam sak a ni. AS Roma forward hlui hian Liverpool tan goal 36 ngawt a khung ta a, Merseyside club tana season hmasa bera goal khung tam ber record a siam.

European top five league-a player zingah Salah-a'n goal a khung hnem ber tawh a, Premier League-a Egyptian player hattrick siam thei hmasa ber hnuaiah Harry Kane (35), Lionel Messi (34), Ciro Immobile (34), Edinson Cavani (33), Cristiano Ronaldo (33), Robert Lewandowski (32), Sergio Aguero (30) leh Neymar (28) te an intlar.

Salah leh goal
4 mins: Minute lina lek a ni a, Salah ropuina kan hmu nghal. Liverpool forward hian Watford defender Miguel Britos chiang zeta bum thluin goal hmahruai a khung.

43 mins: Andrew Robertson siamsak chu Salah-a'n awlsam takin a pet lut.

49 mins: Salah-a'n Firmino tan a siamsak a, Brazilian forward hian goal pawh en loin mawi zetin a kheng lut.

77 mins: Salah-a'n Watford defender rual a bum phar a, hattrick siamna goal a khung.

85 mins: Danny Ings-a goal shot per chu Salah-a'n a goal lina ni turin a khung.

Messi leh Salah
Salah-a'n goal 28 khungin Premier League top scorer a ni mek a, African player zingah Premier League season khata ani aia goal khung hnem awmchhun chu Didier Drogba (29) niin Chelsea legend hian 2009-10 khan he record hi a lo siam tawh.

Liverpool-in Premier League match sarih khelh tur an la neih avangin Salah-a'n record a la siam dawn chauh niin a lang a, Barcelona player ropui Lionel Messi nen khaikhin an ni der tawh. Liverpool boss Klopp tan erawh Messi nena khaikhin tur chuan a la hma mah mah.

Klopp chuan, "Mo hian Messi nena khaikhin nih hi a duhin ka ring lo. Leo hi chuan rei tak chhung Salah khelh dan ang hian a lo khel tawh a, Messi hmaa mimala team chawinung thei ka hriat chu Diego Maradona kha a ni. Salah hian ropuina kawng a zawh mek tih erawh a chiang a, a thiamna leh theihna a pholang reng mai a ni," tiin a sawi.