Zarkawtin MCL final an lut

Mapuia Cricket League-ah Zarkawt Lords-in a vawi khat nan final an lut. Zarkawt club hian Inrinni khan qualifier 2-ah Kulikawn chu wicket liin an hneh a, final-ah Chhinga Veng nen an inhmachhawn ang.

Suaka Cricket Ground-ah Kulikawn an bat hmasa zawk a, run 30 vaw chhuaktu captain

C. Lalrinsanga hoin Lalzui-tluanga (32) leh Vikash Kumar (32) te an rawn chet ṭhat avangin over 20-ah run 130 vaw chhuakin wicket thum chiah an hloh a, eliminator aṭanga champion lai Chanmarians vaw chhuaktu Kulikawn dinhmun a ṭha hle.

Zarkawt Lords-in beisei angin bul ṭan lo mah se G. Lalbiakvela rawn din chhuah hnuah ngai an awh chho a, Lords batsman hian run 48 zet rawn vaw chhuakin run 38 siamtu Zahir Uddin chuan a pui ṭha takzet bawk.

Inkhel boruak sang takah over 19.5-a nihin Zarkawtin wicket ruk hlohin an target an umpha a, wicket lia hnehna changin final an lut–Thawhlehniah 1st division champion lai Chhinga Veng nen champion nih an inchuh ang.