Spurs leh United an chak

FA Cup quarterfinal chu Inrinni zan khan khelh a ni a, Tottenham Hotspur leh Manchester United ten semifinal an lut.

Liberty Stadium-ah Harry Kane-a tel loin Spurs-in Swansea 3-0 in an sawp a, Manchester United-in an mual Old Trafford-ah Brighton & Hove Albion chu 2-0 in an hneh ve bawk.

Super Erik
Spurs tan Christian Eriksen chuan minute 11-na lekah 20 yard aṭangin goal mawi a khung a, Erik Lamela chuan first half injury time-ah a khung belh.

First half-ah hian Eriksen-a ball pek chu Son Heung-min-a'n goal-ah a chantir a, VAR hmanga ennawn a nih hnuah offside vangin pawm a ni lo.

Minute 62-naah Eriksen hian Spurs goal thumna a khung a, Swansea tan Kane-a tel lohna Spurs el phak an ni lo. Tottenham manager Mauricio Pochettino chuan, "Semifinal kan thleng tawh a, hnai tak siin nomawi kalkawng hi a la thui hle. Kan khelhna hmun hi thla sarih liam taa Wembley Stadium ang kha a ni tawh lo a, tunah chuan kan tlangnel tawh a ni," tiin a sawi.

Mourinho a lawm lo
Manchester United-in mualpho taka Sevilla an hneh loh avanga Champions League aṭanga an tlak hnuah nung takin an la khel thei lo a, amaherawhchu Romelu Lukaku (37') leh Nemanja Matic (83') te goal hmangin hnehna an chang.

Portuguese manager Jose Mourinho chuan, "Kan result-ah ka lawm a, kan khelh dan erawh ka lawm lo. Ka duh danin an khel lo a, kan zir danin kan khel lo. Hei hian min tihrilhai a, kan khelh chhiat chhanah tute pawh ka dem a ni," tiin ṭawngkam a duh tui lo hle.

A sawi zel!
United boss Mourinho chuan tun hnaia hming rawn chher tak Scott McTominay chu youth system aṭanga a lakchhuah hnuaa a khelh chhiat ber ṭum a nih thu a sawi a, Serbia midfielder Matic chiahin fakna a dawng.

Mourinho chuan, "Matic a dang hlak a, Sevilla kan hneh loh hnua a rilru put hmang a dik. Scott erawh first team-a a tel hnua a khelh chhiat ber ṭum a ni a, chutihrualin Manchester United kawr ha tlak a ni. Ball a hloh hnem bakah pass sual nasa mah se tih dik tumin huaisena a nei a, ṭhenkhat erawh an khel ngam lo a ni," tiin a player-te a dim lo.

Portuguese manager Mourinho chuan Lukaku goal siam saktu Luke Shaw chu halftime-ah a thlak a, inkhelh banah English left-back khelh danah a lawm loh thu a sawi bawk.