India beiseina a tawp

All England Open Championship-ah Indian shuttler zingah final lut zo an awm lo. Inrinni zan khan PV Sindhu chu Japan nula Akane Yamaguchi lakah 19-21, 21-19, 21-18 a chak loin a zinkawng a tawp.

Birmingham-a inkhelah Sindhu leh Yamaguchi te an inkhel tawk hle, darkar khat leh minute 19 an inkhelh hnuah Yamaguchi chu a vannei zawkah ṭangin a vawi li nan Sindhu a hneh a, India nula lakah hian vawi ruk a tlawm tawh thung.

Semifinal lehlamah world number 1 leh champion lai ni bawk Tai Tzu Ying-i'n China nula Chen Yufei 21-15, 20-22, 21-13 in a hneh. Chinese Taipei nula hian nizan khan a nomawi humhim turin Yamaguchi a hmachhawn zui leh a ni.

Mipa semifinal lamah vawi ruk champion tawh Lin Dan chuan a hnampui Huang Yuxiang lakah 21-14, 13-21, 21-11 in hnena a chang. Lin-a hian a vawi 10 nan All England final a khel a, Chinese shuttler dang Shi Yuqi nen a thiam ber nih an inchuh a, result kan hre hman lo.