Zaninah Mizoram Super League Season 4 Final zan khatna Zarkawt BCA Vs Tuikual South
Mizoram Super League Season 4 final-ah league round-a chak vek Zarkawt BCA leh match nga chhung chak zawn tawh Tuikual South te an inkhel dawn a, zanin dar 8:00 hian Hawla Indoor Stadium-ah game 1 hi khelh tur a ni.
Mizorama basketball inelna sang berah hian Khatla TBL vawi hnih an champion tawh a, nomawi kawl mektu Mission Veng Vikings an tlak tawh bawk avangin champion thar an awm dawn. Final hi best of three a khelh tur a ni.
Rinkai BCA
Zarkawt BCA-in league round-a an intawn ṭumin Tuikual South hi 85-72 in an hneh a, an inkhelh tawhna leh player neih dan thlirin Zarkawt club hun a inher chhuak tura ngaih a ni.
BCA hian Vikings champion puitu Lalrina Renthlei an lalut a, Zarkawt Serpents aṭanga Lalsangkima leh tawnhriat nei ṭha Lalrinkima te an neih belh avangin Mizo hlang chuan inelna ṭan hma hauh aṭangin champion tura rinkai an ni.
Coach Lalruatfela'n passing game a rawn chawi nung a, BCA hian ball pawh tisawt loa rang taka inpek an thiam, an khingpuite tlarhnung ṭhiat turin an game plan an bel a, mimal taka an thiam tel bawk avangin an hmuhnawm hle.
MSL en ṭhin chuan Zonunsanga thiam zia an hmu ṭhin a, semifinal game 3-ah erawh Lalremsanga a rawn langsar a, Henry Lalramngaihawma lam rik tel a ṭul bawk. Feet ruk chuang player Matthew Sailo a puitling tawh a, R. Lalfakawma a rintlak a, Dennis Lalmuanpuia hi tun hnaiah tlahniam deuh mah se anni hi TKS an tum hmasak ṭuma point 27 zet khung thei kha a ni.
TKS an phur
Tuikual South-in MSL4 match hmasa berah Mission Veng Vikings an hneh lo a, upset a ni. He inkhel result vanga an hnual lai takin Zarkawt BCA an hmachhawn a, an inpeih miau loh avangin an chak lohna zat pawh a tam.
Coach KC Lalliantluanga'n a tawnhriat hmangin team naran anga lang tawh chu final hial a thlen pui a, league round match hnuhnung pathumah an chak vek a, chung zingah chuan Khatla TBL pawh an tel. Hetah hian duh tawk loin semifinal-ah champion lai Vikings lakah phuba lain game 3 khelh ngai loin game hmasa pahnihah an hneh nghal.
TKS hian pressure sang ngam F. Zodinthara an kawl a, Tuikual South tlangval hi court chhungah a ṭha a, mipui chawh phur a thiam bawk. Dina'n an veng mipui a chawh phur tawh chuan BCA tan a awlsam dawn lo a, hei hi hriat tel a ṭha bawk - nomawi beisei Tuikual South mipuiin phur sain Hawla Indoor Stadium an pan dawn.
Chak tura ngaih ve vein final kan lut - Lalruatfela, BCA coach
MSL final en tichâkawmtu chu Zarkawt BCA coach Lalruatfela thusawi hi a ni a, Dawrpui tlangval Afela chuan team ṭha pahnihin final an thlen thu Vanglaini a hrilh. Zarkawt BCA coach Afela chuan, "Tuikual South-in Vikings an hneh loh khan an vanduai vang a ni a, an player neih dan aṭanga thlir chuan chak tur an ni. Hei hi semifinal-a an result khan a sawifiah a, keini pawh Khatla TBL aia ṭha zawk kan ni a, chak tura ngaih kan ni," tiin semifinal-ah rinkai zawk ve ve an chak thu a sawi. Afela chuan sawi chhunzawmin, "TKS aiin kan ṭha zawk a tih theih loh. Anni hi team tlo tak an ni a, chak tur chuan 110% a kan ṭan a ṭul dawn. Mipui lam pawhin min ṭawiawm ṭha dawn a, chak tura min beisei ang chiahin an theihna zawng zawng chhuaha min ṭawiawm ve ngei kan beisei," tiin mipui puihna a sawm.
Tuikual South hlang pawhin kan khat ang - KC Lalliantluanga, TKS coach
MSL4 final en man hi Rs 50 a ni a, courtside a ṭhu duh tan Rs 150 a ni. Tunah chuan inkhel en man neih ringawt a tawk lo, kal hma a ṭul tawh ang. Tuikual South coach KC Lalliantluanga chuan, "Tuikual South mipui ringawt pawhin Hawla Indoor Stadium chu kan tikhat thei ang, chuta ṭang chuan kan phur dan chu a chiang mai awm e," tiin ṭawiawmtu an neih ṭhat thu a sawi. Game 1-ah TKS hi away team an nih avangin ṭhutna an chang tlem dawn a, an inrem ṭhat a pawimawh ang. KC-a chuan sawi chhunzawmin, "Min ṭantute lam chuan chak lo turah min dah lo. Chutihrualin neutral thlirna aṭang chuan BCA hi rinkai zawk an ni a, anni hian pressure an ngah zawk ang. A pawimawh ber chu malsawm tlaka kan khelh a ṭul a, BCA hi kan dah sang lem lo a, ngam sarhin kan khel dawn," tiin an khingpui tur a hlauh loh thu a sawi.