Federer hnehin Del Potro champion

Juan Martin del Potro chuan Roger Federer-a beiseina a tih thamral sak. Del Potro hian season bul a ṭan ṭhat ber ṭum tawngtu Federer hnehin BNP Paribas Open title a la - Argentine tlangval hi kumin chhunga world number 1 Federer hneh thei hmasa ber a ni.

Pathianni zan khan Indian Wells-ah Federer hian a vawi ruk nan champion tumin final a khel a, a champion teuh hle. Darkar hnih leh minute 42 an inkhelh chhungin match point vawi thum ngawt a hmu hman. Mahse, tlawm duh lo Del Potro hian 6-4, 5-7 (8-10), 7-6 (7-2) in hnehna a chang ta zawk.

Kum 29 mi Del Potro hi a ban rek na vangin a buai fo, vawi thum ngawt zai a ni tawh. Mahse, kuminah bul a ṭan fuh hle, kum nga chhunga a ATP 500 title hmasa ber ni turin Mexican Open-ah a champion a, tunah a vawi khat nan Indian Wells champion a ni zui leh ta.

US Open champion hlui Del Potro chuan, "Thu in sawifiah a harsa, mumang ang mai a ni. Harsatna hrang hrang ka paltlang hnuah Masters 1000 title ka la ve leh thei hi a mak, a bik takin final-a Roger hneh phei chu a rin thiam a har," tiin a lawm thu a sawi.