Mizoram hmaah team ṭha Goa

Vawiin tlai dar 3:00 hian Mizoram chuan Rabindra Sarobar Stadium-ah kumin Santosh Trophy final round-a an match hmasa ber an khel dawn a, an khingpui tur chu nikum finalist leh vawi nga chamopion tawh Goa an ni.

Group B inkhel dangah Odisha leh Punjab te chu Howrah Stadium-ah an inkhel ang.

Goa nen
Mizoram coach Lalsangzuala Hmar chuan, "Kolkata-ah vawi ruk training session kan nei thei a, kan naute chet vel danah kan lawm hle. Chutihrualin kan khingpuite kan la hmuh loh avangin inelna ṭan hma chuan engmah a la sawi lawk theih loh," tiin Vanglaini a hrilh.

Nikum khan Sanga kaihhruaina hnuaiah semifinal an thleng a, champion zui ta West Bengal chu penalty shootout-ah an hneh lo. Goa pawhin final-ah West Bengal hi hmachhawnin an hneh bik lo a, extra time-ah an chak lo.

Team pahnih inhmachhawn hnuhnun ber ṭum chu kum thum liam ta kha a ni a, group stage-ah 2-2 in an inhnehtawk.

Kumina Goa team hi team ṭha an ni. An coach chu Indian football coach hlawhtling bera chhal ngam Armando Colaco a ni. Ani hian Dempo SC enkawlin I League-ah vawi thum a champion-pui tawh a, kum 2008 khan AFC Cup semi final a hruai thleng tawh - Goa FA hian Santosh Trophy-a champion ngei an duh a, veteran coach hi an ko kir a, I League leh ISL-a tawnhriat nei player an kawl nual.

Mizoram team hi
Mizoram hian I League leh Second Division League lamah MPL6-a player ṭha an chân nual a, Mizoram Police recruitment-ah player ṭha an la nual bawk nen, MPL6-a player ṭha zinga mi 10 chuang an chân.

Qualifying round-a captain leh tun season-a khel ṭha ber R. Malsawmtluanga bakah Malsawmfela leh keeper Lalmuanawma te an inlan thei lo. Mizoram tana thu lawmawm erawh Police player tawnhriat nei ṭha V. Lalṭanpuia, F. Lalrinpuia leh Lalbiakhlua ten an ho thei dawn.

Champion lai chak
Nimin khan Santosh Trophy chu Kolkata-ah khelh ṭan a ni a, inelna thlengtu leh champion lai West Bengal chuan Manipur 3-0 in an hneh. Group A inkhel dangah Kerala chuan Chandigarh chu 5-1 in an sawp ve bawk.