NECS Cup 2018 Semifinal Football thiam veng pali inlan dawn

Aizawl DFA buatsaih NECS Cup vawi rukna chu vawiin hian Lammualah semifinal khelh a ni dawn. Chhun dar 12:00-ah Ramhlun South leh Electric Veng an intawng dawn a, tlai dar 2:00-ah Bawngkawn leh Chanmari an inkhel zui ang.

Ramhlun vs Electric
CYMA football champion lai Ramhlun South-in Mizo striker hriam ber pakhat Malsawmfela an chhawr thei lo a, Electric Veng lamin Sontosh Trophy khelh vangin Lalbiakhlua leh V. Lalṭanpuia te an chân ve bawk.

Ramhlun South-in goal sarih khung tawh R. Lalthanmawia an nei a, Amawia thlawp tur hian Lalremruata (4 goals) an nei bawk; Remruata hian quarterfinal match pathumah goal hnih a khung thei. Bawngkawn laka goal li chhuahtu Electric Veng tan tlarhnung remphui a pawimawh dawn.

Electric Veng hian Zemabawk, Lengpui leh Venghlui lakah goal chhuah loin hnehna an chang thei a. An khelh ṭhat ni chuan suttlang an harsa tih a hriat, goal venhim lam an ngai pawimawh hmasa zawk a nih pawhin a mak lo ang a, goal khung kawngah Aizawl FC forward Jonathan Lalrawngbawla a pawimawh ang.

Intiat tawk
Nikum finalist Bawngkawnin Mizoram tana a feh chhuak avangin an thiampuipa MS Dawngliana chu an chhawr thei dawn lo, Dawngtea ang tho hian Chanmari-in defender Lalrinchhana Tochhawng leh C. Lalmuanawma an chân ve bawk, goal ven kawngah tawnhriat ngah Rochhingpuia an pawh let leh a ṭul ang.

Bawngkawn tan Dawngtea awm dawn lo mah se goal sarih khung tawhtu Isak Vanlalruatfela an nei, Bengaluru youth team player hian match ruk an khelh tawh zinga match liah goal a khung vek, a khung lohna match pakhat hi an tlin chian tawh hnua Lengpui an hneh loh ṭumin a ni.

Chanmari tan Jerry Mawihmingthanga chu tlarhma lama player hmachhuan a ni dawn, Jamshedpur FC forward hian quarterfinal match pathumah goal a khung vek. Match ruk khelh aṭanga clean sheet vawi hnih chiah nei thei Bawngkawn tlarhnung ṭhiat turin Jerry hi a hriam tawk ang.