Ronaldo ropuina a la ngai reng

Cristiano Ronaldo-a chuai tawh nia ngaitute tan ngaih­tuahna sen ṭhat a ṭul. Portuguese forward hian Pathianni zan khan Girona lakah goal li a khung a, Real Madrid chu an mikhual lakah 6-3 in hnehna a chanpui.

Pathianni zan inkhel dangah Barcelona chuan 2-0 in Athletic Bilbao an hneh bawk a, Paco Alcacer leh Lionel Messi ten goal khat ve ve an khung.

Catalan club-in hnehna an chan avangin league match 29 chhung chu tlawm hmel an hmu ta lo a, pahnihna Atletico Madrid-in 2-1 a Villarreal an ngam loh bawk avangin league-ah point 11 zetin hma an hruai fal tawh.

Real 6-3 Girona
1-0, Ronaldo (10 mins): Cor­ner aṭangin Toni Kroos leh Marcelo-ten ball an inpek kual hnuah Kroos-a'n Ronaldo a hmu fuh a, Portuguese forward-in net zawn hmuh a harsat lo.

1-1, Stuani (29 mins): Girona tan Cristhian Stuani-a'n si phurh sutna goal a tauh lut.

2-1, Ronaldo (48 mins): Karim Benzema-a through ball um lutin Ronaldo-a'n Real hma a hruai nawn pui.

3-1, Vazquez (58 mins): Team movement mawi zet kan hmu a, Marcelo, Benzema leh Ronaldo ten ball an inpek kual hnuah Portugal captain hian Lucas Vazquez tan a siam sak a, Spanish winger-in an goal thumna a khung.

4-1, Ronaldo (64 mins): Benzema goal shot chu goal­kee­per Yassine Bounou-a'n dang mah se a per lehlam Ronal­do ke bulah a tla a, kum 33 mi forward hian ram leh club tana a hattrick 50-na ni turin a khung.

4-2, Stuani (68 mins): Stuani-a'n a goal hnihna a khung a, Girona beiseina a nung thar.

5-2, Bale (86 mins): Tot­tenham Hotspur player hlui pahnih kan hmu a, Luka Modric-a siamsak chu substitute Gareth Bale-a'n offside trap a bum hnuah a khung.

5-3, Juanpe (89 mins): Girona defender Juanpe-a'n vengtu nei loin goal a khung a, Real tlarhnung pherh zia hmuh hmaih theih a ni lo.

6-3, Ronaldo (91 mins): Ronaldo-a'n a goal lina a khung a, Girona beiseina a tawp.

Khawvel pawn lam mi!
Ronaldo-a'n a match hnu­hnung 11 aṭangin goal 21 zet a khung ta a, tun season-ah goal 37-a khung tawh - heti zat goal khung tur hian match 35 bak a mamawh lo a, European top five league-a goal khung hnem ber dinhmun luahin Mohamed Salah (36 goals) a nek chhuak.

Real Madrid coach Zinedine Zidane chuan, "Ronaldo hi chu khawvel dang aṭanga lokal a ni a, he thuah hian phat tur engmah a awm lo. A khelh ṭhat hi chuan a mimal tan mai ni lo club tan pawh a ṭha tel a, Ronaldo a chet ṭhat chuan he team hi a che ṭha ṭhin," tiin Ronaldo chunga an innghah nasat thu a pha lo.

Ronaldo-a'n league-ah match 23 khelin goal 22 a khung tawh a, La Liga-ah goal khung tam lama a phak loh chu Messi chiah a ni tawh - Argentine forward hian goal 25 a khung tawh.

Barca an kal zel
Barcelona-in Pathianni zan inkhelah hrem vangin Luis Suarez chhawr thei lo mah se harsatna an tawh phah lo. Uruguayan striker hmun ruaka luhtir Alcacer chuan minute riatna lekah goal hmahruai a khung a, Messi-a'n minute 30-naah a chhunzawm ve leh bawk.

Catalan club tan Liverpool forward hlui Philippe Coutinho-a'n goal khungna remchang nei mah se vawi hnih ngawt crossbar a pet per a, Paulinho chuan post a pet per bawk. Barcelona tan tlawm hmel hmu loa league nomawi chawi turin dinhmun a ṭha tawh hle.

Ernesto Valverde team hian match 29 an khelh tawhah vawi 23 hnehna an chang a, vawi ruk an khingpui an inhnehtawkpui. La Liga chanchinah match 38 chhung tlawm hmel hmu loa season hmang tluan an la awm ngai lo a, tlawm hmel hmu lo rei ber record chu match 32 chhung tlawm lo Real Sociedad-in 1979-80 season khan an lo siam tawh.

Tlawm tum lo val
Barcelona tan record siama league nomawi chawi turin match kua bak a ngai tawh lo a, Barca boss Ernesto Valverde pawh a ṭawng pawr sawt hle. Spanish coach chuan, "Point 27 chiah hlawhchhuah tur a awm tawh a, point zawng zawng hi hlawhchhuah kan tum ang," a ti!

Valverde chuan sawi zawm­in, "Tunah kan khelh anga kan khelh reng theih chuan kan tum hi kan tihlawhtling thei ang tih ka hria. Bilbao lakah pawh first half-ah goal khung chance vawi tam kan insiam a, kan hmuhnawm takzet a ni," tiin a naute fak nan ṭawngkam ṭha a ui lo.

Barca an kal zel laiin anmah­­ni hnaih bertu Atletico Madrid erawhin khualmualah hnehna an chang zo lo. Villarreal khelmualah Atletico-in Antoine Griezmann penalty hmangin goal hmahruai khung mah se hun tawp hnaih lama Enes Unal goal hnih hmangin Yellow Submarine-in 2-1 in hnehna an chang.