India chakna Dinesh Karthik

Pathianni zan Nidahas Trophy final-ah India leh Bangladesh an inhma­chhawn a, ball khat chiah a awm tawh tiha India-in chak tura an mamawh zat chu run nga a ni - pressure sang tak hnuaiah Dinesh Karthik a talbuai duh lo a, six run vaw chhuakin India chu wicket liin hnehna a chanpui.

Colombo khawpuia inkhelah Bangladesh bowler Mustafizur Rah­man-a'n over 18-naah run pe miah loin a vawm a, a ball tawp ber hmangin Manish Pandey a vawm out bawk. India-in ball 12 lek hmachhawn tur an neih tawhah chak turin run 34 an mamawh phah a, Bangladesh fans an lam tawh.

Mahse, Men in Blue tan Dinesh Karthik a lo ding chhuak a, kum 32 mi wicketkeeper-batsman hian pressure sang hnuaiah a tawnhriat ngah a chhawr ṭangkai - ball riat lek a hmachhawnah run 29 a rawn vaw chhuak a, India a chakpui.

Bangladesh hian over 20 lekah Sabbir Rahman (77 runs) chet ṭhat chhawrin run 166 an vaw chhuak a, wicket riat an hloh. India hian Karthik chet ṭhat chhawr ve thungin over 20-ah run 168 an siam a, wicket ruk an hloh.

India tan hian Rohit Sharma chuan run 56 a siam ve bawk a, ball 42 bak a mamawh lo - Virat Kohli awm loh hlana captain hi batsman zinga T20 run 7000 siam thei 10-na a ni nghal. Bowling lamah India tan Yuzvendra Chahal chu player langsar niin over li a vawmah run 18 chauh pein wicket thum a la ve bawk.