Vawiinah MCL champion kan hre dawn
Mizoram cricket inelna ngaihhlut leh sum tamna ber Mapuia Cricket League final chu vawiinah khelh a ni dawn a, chawhma dar 10:30 hian Chhinga Veng leh Zarkawt Lords-in champion nomawi an inchuh ang.
Suaka Cricket Ground, Sihhmuia inkhela chak zawk hian
Rs 115,000 an dawng dawn a, a chak lo zawkin Rs 65,000 an dawng thung ang - hmingṭhatna piaha sum dawn tur inthlauhna hi Rs 50,000 ngawt a ni.
Roreltu Chhinga Veng
1st division champion lai 3C-in Mizoram cricket-ah match 14 chhung tlawm hmel an hmu tawh lo. League match ngaah hnehna chang vek chungin qualifier 1 an khel a, vawiina an hmachhawn tur Zarkawt hnehin final an lut.
Chhinga Veng inchhuanna K. Vanlalruata'n match ruk aṭangin run 246 a siam tawh a, mah se qualifier 1-ah run kua bak a siam thei lo - 3C champion-na turin Durtlang tlangval chet ṭhat a ṭul ang a, bowling lamah wicket riat ve ve la tawh Hruaimawia Ralte leh Lalnuntluanga chet ṭhat a ṭul ang.
Rorel duh 'Lords'
Zarkawt Lords-in league-ah match khat chiah tlawm hmel an hmu a, an ngam loh chu 3C an ni - qualifier 1-ah an ngam lo nawn. Season hmasa khan Chhinga Vengin hneh loh pakhat chiah an nei a, Chanmarians chu qualifier, league leh final-ah an ngam lo vek.
3C-in season hmasaa an tawn ang hi Lords tawn tir an tum ang a, Zarkawtin thawnthu hlui ṭhiata roreltu nih an tum thung ang - Zarkawt club tan run 194 siam tawh Zahir Uddin, wicket 14 latu Lalrempuia leh Zorinliana Sailung (12 wkts) chu innghahna tur an ni.