Dovizioso chak hmasa ber

Bike intlansiakna ngaihhlut leh sang ber MotoGP chu Pathiannin zan khan Qatar-ah tlan ṭan a ni a, Andrea Dovizioso chu pakhatna niin a hnungah world champion Marc Marquez a thleng thung.

Losail International Circuit hi Dovizioso tan hmun ṭha a ni, tun hnai sea­son hnuhnung pathumah khan pahnihna a ni vek. Tun season bul ṭan nan an hmang a, Ducati rider hian minute 42 leh second 34.654 chhunga lap 22 tlan thlengin hnehna a chang.

World champion vawi kua ngawt ni tawh Valen­tino Rossi chu pathum­naah a thleng thung. Cal Crutchlow leh Danilo Pe­trucci ten zuiin, season hmasa intlansiak hmasa pahniha pakhatna ni thei Maverick Vinales erawh parukna a ni hram thung.

A tawpah Dovizioso
Italian rider Dovi­zioso-a'n awlsam takin hnehna a chang bik lo, lap nga chiah tlan hmabak an nei tawh tihah hmahruaitu Johann Zarco a tlan pel. Yamaha rider Zarco hian pole aṭangin intlansiak bul a ṭan a, hun rei tak chhung chu hmahruaitu a nih chhunzawm bawk.

Season hmasa world championship-a pahnihna Dovizioso hian hma a hruai hnuah nuamsa takin hnehna a chang mai bik lo, lap hnuhnung ber an tlan thlengin Honda bike khalhtu Marquez nen an inum tawk hle; harsa takin MotoGP bika a vawi sarih nan hnehna a chang hram.

Kum 31 mi Dovizioso chuan, "Duhthusam a ni, hna kan thawk ṭha hle. Bul ṭan ṭha tawk lo mah ila ka beidawng lo a, zawi muangin ka insiam ṭha chho zel a, a tawpah hneh­na ka chang," a ti. Dovi­zioso hian quali­fier a tlan ṭha tawk lo a, pangana aṭangin intlan­siak bul a ṭan.

Marquez-a'n a ui
Spanish rider Mar­quez-a'n hnehna chan ngei tuma a beih thu a sawi a, "100%-in ka bei, kawng kawi hnuhnung berah ka duh angin ka tifuh tawk lo a, kha tah tak khan kawi fuh zawk ni ila chuan hnehna chan beiseina a awm," tiin a theihtawp a chhuah thu a sawi.

Kum 25 mi Marquez chuan sawi zawmin, "Sea­son hmasa pawh khan duhthusamin bul kan ṭan lo, kuminah theihtawp kan chhuah a, mahse kan hlawh­tling nghal lo. Hnehna chan phu takin kan bei a, kan duh ber thleng lo mah ila pahnihna nih hi a chhe lo," a ti.

Italian rider Rossi erawh dawhsana a din phak avangin a lawm hle. Yamaha bike khalhtu Rossi chuan, "Season hmasa ai khan beisei ka nei sang zawk. Ka team chungah ka lawm a, tun ang zela ṭha hian tlan theih ka beisei," a ti. Season hmasa QatarGP-ah khan Rossi hi pathumna bawk a ni.

Kum 39 mi Rossi hian kar hmasa lawk khan Yamaha tan hian season hnih daih contract a ziak thar a, tun season tawp ruala a contract tawp tur a pawh sei tak avang hian kum 41 a tlin thleng MotoGP bike a khalh dawn.