Osaka tan WTA title hmasa ber

Pathianni zan khan BNP Paribas Open khelh zawh a ni a, player langsar tam tak karah seeded pawh chang phak lo Naomi Osaka a champion - Japanese nula tan WTA title hmasa ber a ni nghal.

Indian Wells-a inkhel­ah world number 44 Osaka hian darkar khat leh minute 10 chhungin Daria Kasatkina chu 6-3, 6-2 in a hneh. Kum 20 mi Osaka hi California-a hard court inelna ngaihhlutah hian 2008 hnu lama champion thei naupang ber a ni. Serena Williams leh Kim Clijsters te hnungzuiin seeded ni lo champion thei pathumna a ni bawk.

Osaka hian final lut turin semifinal-ah world number 1 Simona Halep a hneh thei a, pahnihna Kasatkina pawhin Grand Slam vawi sarih champion tawh Venus Williams a vaw chhuak thei.

Osaka chuan, "Ka­satkina khan point zawng zawng hmuh tumin a khel a, ka tan pawh a awlsam lo hle a ni. Mahse, ka ball vuak a dikin sir tak takah ka pe thei a, ka vannei zui ta a ni," tiin a sawi. Osaka hian aces vawi nga a siam a, double faults vawi thum neiin a service hmasa aṭangin 79% ngawt point a hmu thei.

Japan rama khawpui pakhat Osaka-ah Osaka hi a piang a, a hming leh an khaw hming a in ang. Kum thum mi lek a nih laiin USA-ah an pem a, American khua leh tui nihna nei a ni.