Euro C'ship sawn leh a nghawng

Europe-a football thuneitu sang ber UEFA chuan Thawhlehni zan khan coronavirus vanga European Championship sawn chungchangah thuchhuah a siam a, an thutlukna hi European Club Association (ECA), European Leagues (EL) leh FIFPro Europe te nen inthuruala an pawm a ni.

Thawhlehni chhun khan UEFA, ECA, EL leh FIFPro ten video conference hmangin Europe chhunga football kal zel dan tur an rel a, ram hrang hrang league-te khelh zawh a nih theih nan June 12- July 12, 2020-a neih tur chu June 1 - July 11, 2021-ah sawn a ni.

UEFA hian club inelna Cham-pions League, Europa League leh ram tin league-te pawh rel telin club inelna hi June 30, 2020-a zawh hman tum a ni.

UEFA European Football Championship vawi 16-naah ram 24 chu khawpui 12-ah an inel dawn. Ram 20 tling tawhte chu Belgium, Italy, Russia, Poland, Ukraine, Spain, France, Turkey, England, Czech Republic, Finland, Sweden, 

Croatia, Austria, Netherlands, Germany, Portugal,  Switzerland, Denmark leh Wales te an ni.

Ram pali dang hi playoff hmanga la zawn leh tur a ni a, Path A-ah Iceland Vs Romania leh Bulgaria Vs Hungary ten hmun ruak pakhat an inchuh dawn. Path B-ah Bosnia and Herzegovina Vs Northern Ireland leh Slovakia Vs Republic of Ireland; Path C-ah Scotland Vs Israel leh Norway Vs Serbia; Path D-ah Georgia vs Belarus leh North Macedonia Vs Kosovo te an inkhel dawn. Path tin aṭang hian hmun ruak pakhat ṭheuh a awm.

Playoff hi March 2020-a khelh tur ni mah se coronavirus vanga buaina a chhuah tak avangin June 2020 hmaa khelh turin thutlukna an siam a, hemi hnu hian a remchan dan angin inkhelh hun hi la rel ṭhat leh tur a ni. Euro C'ship khelh hun sawn a nih tak avangin kum 2021-a inelna ruahman sa tih danglam a ngai tel dawn. June 2021 hi Europe ramte tan World Cup qualifier - matchday 3 leh matchday 4 khelh hun chiah a ni a, tunah erawh sawn a ṭul ang.

June leh July 2021 chhung hian UEFA hnuaia inelna Nations League Finals, Under 21 C'ship leh Women’s C'ship te khelh a ni dawn a, hengte pawh hi an khelh hun thlak danglam a ni ang. Chutihrualin inelna khelh hun an thlak danglam hunah hian club-in an player-te an chhuahtir ngei a ngai thung dawn.

UEFA-in Euro C'ship khelh hun a sawn chhan ber chu tun season chhung ngeia club inelna a zawh theih nan a ni a, season kal lai hi June 30, 2020-ah a tawp dawn. Hemi hmaa season a zo hman lo a nih chuan player contract-ah nghawng a nei dawn a, transfer chungchangah a nghawng a nei tel bawk ang.

Hetia coronavirus vanga league hrang hrang chawlh lailawk a nih avang hian June 30-a inelna zawh pawh hi a harsa dawn. Fixtures thar a chhuah hunah pawh kartawpah chauh ni loin kar laklawhah pawh league match a awm tam tura ngaih a ni a, Europe inelna lian Champions League leh Europa League te pawh kartawpah khelh a ni thei bawk.

Chutihrualin coronavirus dinhmun a zirin June 30-ah hian inelna hi zawh a ni lo thei a, hemi hi a thleng a nih chuan UEFA lamin season thara Champions League leh Europa League qualifier khelh dan a thlak danglam ang.