FIFA President-in thuchhuah a siam

UEFA-in European Championship 2020 khelh hun sawn tura thutlukna an siam ang thoin CONMEBOL pawhin 2020 Copa America khelh hun an sawn a, FIFA inelnaah nghawng a neih avangin football thuneitu sang ber president Gianni Infantino pawhin thuchhuah a siam nghal.

FIFA hian nakkum June/July thlaa Euro 2020 leh 2020 Copa America sawn chu an pawmpui tur thu a sawi a, FIFA Club World Cup khelh hun pawh a ṭul dan a zira an thlak danglam tur thu an puang nghal. FIFA Club World Cup hi nakkum aṭangin kalphung thar nena neih tum a ni a, ṭum danga team sarih neih ṭhin chu 2021 aṭangin team 24-ah tihpun tum a ni a. Inelna hmasa ber thleng tur hi China a ni a, coronavirus inṭanna hmun a ni.

FIFA chuan Club World Cup inelna hun sawn chungchangah Chinese FA leh Chinese sorkar an kawm dawn. Hei bakah hian FIFA hnuaia football kal zel dan tur remchang hmasa berah an ngaihtuah dawn a, April hmain calendar thar hi tihchhuah hman an beisei.

Coronavirus do kawngah FIFA hian hma lain World Health Organisation Covid-19 Solidarity Response Fund hnenah dollar maktaduai 10 a pe a, he natna vanga tuar football community ṭanpui dan an ngaihtuah bawk. FIFA chuan football lama inhnamhnawih tawh phawt chu coronavirus do kawnga hma la turin a ngen a ni.