Mizoram chakna Samlukhai rawlthar

Santosh Trophy vawi 72-naah Mizoram chuan nimin khan an match hmasa ber an khel a, Goa-in goal an khung hmasak zet hnuah 2014 champion-in goal thumin an chhanglet. Mizoram goal hnuhnung pahnih hi Samlukhai tlangval Lalromawia khung a ni.

Nimina Kolkata-a Rabindra Sarobar Stadium inkhelah Goa tan Victorino Fernandes chuan minute 11-naah goal hmahruai a khung a, Mizoramin F. Lalrinpuia hmangin minute 25-naah an sut. Hun tawp hnaih tawh, minute 81 leh 84-naah Romawia'n chakna leh chak nemnghehna goal a khung. Group B inkhel dangah Punjab-in Odisha 2-1 in an hneh ve bawk.

Bul ṭan ṭha Goa
Goa lamin Santosh trophy-a champion ngei an tum a, captain-ah India tan pawha inlan tawh Victorino Fernandes an hmang a; Sporting Goa tana I League khela Mizorama rawn zin tawh Marcus Masceranhas te pawh bul ṭantu zingah an tel.

Mizoram an talbuai laiin Goa erawhin ṭha takin bul an ṭan a, minute 11-naah vei lam aṭanga Masceranhas cross chu Victorino-a'n chang fuhin Mizo defender patlangin goal hmahruai a khung- minute 15 chhung inkhel an thunun zui.

Mizoram an buai lo
Coach Lalsangzuala Hmar hote goal khat an chhuah avangin an talbuai lo a, minute 21-naah Republic Veng tlangval Valpuia'n Mizoram Police tana a khelhpui Lalbiakhlua thawhrah sengin si phurh sutna goal a khung.

Goa veltu Samlukhai rawlthar Romawia
Mizoram hian inkhel an thunun a, goal dang lut lawk lo mah se minute 81-naah Romawia a rawn lang. Ding lam aṭanga Biaktea ball vawrh luh chu Lalremruata'n a tauh thlak hnuah Romawia'n yard 14-na vel aṭangin a pet goal.

Minute thum hnuah Romawia bawk a rawn lang a, box pawn aṭangin kawh zetin a pet goal. Samlukhai rawlthar hian Mizoramin final round an luh theih nan Assam lamah goal hnih a khung tawh bawk. Romawia goal pahnih inkarah hian Remruata'n crossbar a tauh per bawk.

Romawia hi MPL-ah pawh mi thar a ni a, Chanmari West FC tan khelin MPL 6-ah a hmel kan hmu ṭan a - tunah Mizoram rinrawl a ni tawh.

Chak phu Mizoram
A hmuna entu Goal.com writer Swapnaneel Parasar chuan, "Goal khat chhuah vangin Mizoram an talbuai lo a, second half-ah phei chuan an chungnung hle. Inkhelh dan aṭanga teh chuan Mizoram hi 6-1 a chak tur an ni," tiin Vanglaini a hrilh.

Mizoram manager Hmingsanga chuan, "Kan naute inpekna a fakawm a, goal khat kan chhuah hnuah pawh kan hnual lo. Kan goal khung ang zat bawk hi chance ṭha kan hlah a, India ram state zinga langsar Goa kan hneh thei a, point thum kan hmu hi kan lawm hle," tiin Vanglaini a hrilh.

Goa hi nikum finalist an ni a, Santosh Trophy-ah vawi 13 final lut tawhin vawi nga an champion tawh. Tun ṭuma an coach Armando Colaco hi Churchill Brothers, Dempo, East Bengal bakah India national team thlenga enkawl tawhtu a ni. Colaco kaihhruai team hian MPL-a vawi hnih champion tawh coach Sanga enkawl team an hneh lo.

Group B – Thlirna
Nimin Inkhel Results
Odisha 1–2 Punjab
ODI : Nabin Suna 62'
PUN : Sarbjit 69';
Rudra Pradhan 81' (OG)
Mizoram 3–1 Goa
MIZ : F. Lalrinpuia 25';
Lalromawia 81', 84'
GOA : Victorino Fernandes 11'
March 22, Ningani
3:00 PM Karnataka Vs Goa
3:00 PM Odisha Vs Mizoram