Governor nih tum Romario de Souza

Brazilian senator leh football legend Romario de Souza chuan October-a Rio de Janeiro governor thlan hunah chuh ve a tum thu a tichiang a, tunah hian Rio de Janeiro senator a ni mek.

Rio de Janeiro state hi tun dinhmunah tharum thawhna hluar avangin an talbuai mek a, sum lamah an tlachhe mek bawk. Kum 1994 World Cup champion zinga mi Romaria chuan heng harsatna zawng zawng hi thlan tlin a nih chuan a chinfel tur thu a sawi.

Podemos party ticket-a ding tur Romario chuan, "Tun ang boruak harsa tak karah hian inthlak danglam kan mamawh a, chu inthlak danglamna chu a rang lamin kan mamawh a ni. Rio hian harsatna a nei fo ṭhin tih chu kan hria a, mahse engtiklai mahin tun ang erawh a ni ngai lo," a ti.

Barcelona tana lo khel tawh Romario hian senator a nihna angin football-a hleprukna awm tam tak chu hailangin a bei a, hemi kawngah hian fak a hlawh hle. Hetihlai hian a leiba neihte rul loa a awm theih nan a thil neih tam tak a thukru nia sawi a ni a, he puhna erawh a pha thung.