Young-a'n contract a pawtsei

Manchester United midfielder Ashley Young chuan kum khat atan a contract a pawtsei a, English midfielder hi Jose Mourinho hnuaiah full back anga chhawr a ni.

Kum 32 mi Young hian tun season-ah match 30 a khel tawh a, Portuguese manager hian left-back Luke Shaw aiin a ring zawk. Aston Villa midfielder hlui khelh dan hi England boss Gareth Southgate pawhin a hmuh hmaih lo a, an match hnuhnung bakah Netherlands leh Italy nena friendly match an khelh turah pawh a ko.

English midfielder hi Villa Park-ah kum li chhung a cham hnuin kum 2011 khan Sir Alex Ferguson chuan Old Trafford-ah pound maktaduai 16 bawr velin a la lut a ni.

United defender Marcos Rojo pawhin kum 2021 thlenga Old Trafford-a cham turin contract a pawtsei tawh bawk. Argentina international defender contract neih lai hi June 2019-a tawp tur a ni a, inhliam vanga khelhna hmun chang tam lo mah se Old Trafford-a cham zel turin thutlukna a siam.

Kum 27 mi Rojo chuan, "Manchester United ka zawm tirh aṭang khan he club-ah hian awm tura ka beisei leh beisei phak loh thlengin a awm a, hetiang club ropuia ka cham thei hi ka lawm hle a ni," tiin a sawi.

Argentine defender hian tun season-ah match 10 chauh a la khel a, a inkhelh hnuhnun ber chu February thlaa Huddersfield Town nen an inkhelh ṭum kha a ni.