NECS Cup Final-ah Ramhlun South leh Chanmari
Ramhlun South chuan Electric Veng 3-1 a hnehin XTECH-NECS Cup 2018 final an lut. Vawi hnih champion tawh Ramhlun South hian nikum finalist Bawngkawn 3-2 a lehthaltu Chanmari nen Ningani chawhnu dar 2:00 hian Lammualah final an khel ang.
Ramhlun 3 Star
Nimin Lammuala inkhelah Ramhlun South lamin bul an ṭan fuh zawk a, minute 29-naah R. Lalthanmawia chuan mual ding lam aṭanga Lalnunmawia ball siamsak chu goal hmahruai khung nan a hmang. Amawia hian tun inelnaah goal riat a khung tawh.
Inkhel chawhnu lamah Electric Veng an che fuh hmasa, second half minute khatna lekah Vanlalremsanga hmangin an siphurh an sut. Remsanga goal hian an match hnuhnung pahniha goal chhuah lo Ramhlun South a beng harh.
Goal hmahruai khungtu Amawia'n minute 57-ah buai nuaih karah Mawitea goal khung tur a siamsak zui a. Electric Veng hian MZU Sports vangin central defender Rorelliana an chan a, player rinrawl Rorela aia lut VL Hmuchhuaka'n a hmun ruak a luah zo tawk lo.
Electric Veng tlarhnungin minute hnih hnuah an offside trap siam sual an tuar, defender kara put chhuak Lalmawizuala'n fal taka ball tlan luh puiin mawi zetin keeper Lalrinnunga Hnamte a chip khum.
An lawm
Samson Ramengmawia kaihhruaina hnuaia khel Ramhlun South hmatawng pathum - Amawia, Nunmawia leh Mawizuala te an in man in an hmuhnawm a, goal khat ṭheuh an khung bakah assist an nei vek bawk.
Ramhlun coach Samson-a chuan, "Kan thawhhona a ṭha a, player bakah coaching staff kan inpawh tlang hle," tiin Vanglaini a hrilh. Shillong Lajong captain hlui hian an hmatawng pathum an khelh ṭhat vanga a lawmthu a sawi bawk.
Electric Vengin an player pawimawh Lalbiakhlua leh V. Lalṭanpuia te awm loh an tuar, an goal nawr a nat tawk loh bakah inkhel boruak sang taka ho khawmtu an nei ṭha tawk lo.
Electric Veng coach Vanlalsawma Colney chuan, "Kan kim loh kan tuar, chutih rualin kan thlen chin hi a sang tawk kan niin kan lawm hle. Buaina leh harsatna hrang hrang karah semifinal kan thleng hi kan lawm," tiin Vanglaini a hrilh.
A hunah Chhinga
Semifinal hnuhnung zawkah Bawngkawn leh Chanmari inkhelah minute 90 chhungin chak zawk an awm lo a, extra time khelh a nih hnuah Jerry Mawihmingthanga thawhrah sengin Rochhingpuia'n chakna goal a khung a, a vawi khat nan NECS Cup final an lut.
Nikum final-a chak lo zawk Bawngkawn lamin an khingpui hlauhawm zia an hre chiang a, an goal an veng ngawrh viau. Chawlhlawk hma hretin Khelo India best player Lalnunzama veng hneh loin goal an chhuah tho a, 1-0 in half time an hmang.
Bawngkawn hian MS Dawngliana awm loh niah Vanlalawia hmangin minute 47-naah si purh an sut - defender rinrawl Lalrinchhana Tochhawng leh C. Lalmuanawma tel loa khel Chanmari an inring hman lo.
Chanmari lamin Lalrosanga foul vangin penalty an chawi a, a pet turin Isak Vanlalruatfela a rawn ding chhuak. Isak-a hian tun tournament chhunga a goal riatna khung turin harsatna a nei lo.
Bawngkawn lamin an tlarhnung an rem phui a, hun tawp dawn thlenga an goal an venhim theih avangin a zawnin final an lut ngei dawn niin a lang hman. Mahse, hun tawp hma minute khat chiah a awm tawh tihah Zama siamsak Jerry-a'n a tauh lut.
Goal hnih ve ve an neih vangin extra time khelh a ni. Quarterfinal match pathuma goal khung vek Jamshedpur FC forward Jerry-a'n out tawh tura ngaih ball a la thei a, cross zuiin Bawngkawn lamin an tauh chhuak ṭha tawk lo - ball chhuak dawng fuhtu Chhinga'n chiang zetin chakna goal a khung.