Russia football a thianghlim - Bezuglov

World Cup thleng tur Russia team doctor Eduard Bezuglov chuan, khawvela infiamna huang dang zawng zawng aiin an ram football team chu an thianghlim thu a sawi.

Damdawi hman phal loh hman chungchanga an hmingchhiat avangin Russian athlete ten thununna an tawk mek a, Rio Olympic leh Winter Olympic Games-ah an ram hminga an inlan pawh phal sak an ni lo.

Athlete-te chunga thil thleng avang hian football pawhin rinhlelh a kai. Amaherawhchu, Bezuglov erawhin Russian Football Union (RFU) leh Russian Anti-Doping Agency (RUSADA) ten dik leh thianghlim taka thil tih a nih theih nan hma an lak thu a sawi thung.

Russian team doctor Bezuglov chuan, "Inzirtirna leh inhrilh hriatna kan nei ṭha a, infiamna peng dang chu ka sawi theih a ni lo. Football bikah chuan league-a khel player zawng zawng hian dan an zawm famkim a ni," tiin a sawi.

Bezuglov hian kum 2015 November thla hnu lamah, World Anti-Doping Agency (WADA) chuan Russian player 1,500 ngawt a endik tawh thu a sawi bawk. Bezuglov chuan, "Heng zawng zawngah hian thil dik lo hmuh tur a awm lo," a ti.