Arsene Wenger, Arsenal leh Zawhna

"Emirates Stadium-ah ka kir leh ang maw? Arsenal ka chhuahsan fel tawh, ka thutlukna siam tawh hi keimah ngei pawh ka inhrilh nawn fo ṭhin," tih chu Arsene Wenger ṭawngkam ngei a ni si. "Arsenal-ah i kir leh dawn em, manager ni lo pawhin inkhel entu ang tal pawhin?" tih zawhna a chhanna chu a ni.

French pachal hian Gunners a chhuahsan hnuah hnunglam a hawi tawh lo, manager ropui dang Sir Alex Feguson ang lo takin a club hlui inkhel hi a hmunah pawh a la en leh lo nia! Pa luhlul, tuma chiang leh rilru nghet a ni a, a duh lohna lama kawih her chu a awlsam lo tih a chiang

Arsene Wenger hian tun thlengin Arsenal hi a rilru luahtu a ni tih chu a zep lo. English club a enkawl laia a personal assistant Sheila nen an la inbe pawp ṭha a, training ground lam enkawltu Steve Braddock bakah midang pawh a la be fo.

Braddock phei hi chu kumin April thla vel khan a damlo a, a hriselna dinhmun chungchang chu Wenger-a'n a zawt fo. Gunners tana hna thawktu dangte nen pawh phone hmangin an la inbe tho nia sawi a ni.

Amaherawhchu, 'Mahse' tia sawi zawm a ngai. Club neitu Stan Kroenke leh thuneitu sang ṭhenkhat nen erawh tukhum chhah an inchhawn chiang hle, media hmaah sawi chhuak chiah lo mah se an thinlung erawh a inhlat tih a hriat theih.

Arsene Wenger leh Sir Alex Feguson te hi 'nu hmun lo pa hrang' an ni a, thisena inzawmna an nei lo. Khelmual chhung leh pawnah na tak takin an inbei fo a, iner si loa inel na em em an ni thung. Manager ropui pakhat chanchin kan sawi a nih chuan pakhat zawk hming a lan tel ngei a ngai.

Sir Alex pawhin Old Trafford a chhuahsan tawh, a chhuahsan club inkhel en tur hian stadium-ah a kir fo a, a hming tar meuha a ṭhutna tur an siamsakah a ṭhu ṭhin. Manchester United a enkawl lai khan stadium pawnah a lim (statue) siamsak a ni tawh bawk.

Old Trafford pana fans kalna kawng pawimawh pakhat chu 'Sir Alex Ferguson Way' tih a ni a, season hnuhnung ber a hman lai khan mipui ṭhutna hlawm pakhat (stand) chu Ferguson hminga phuah a ni daih tawh. United enkawl tawh lo mah se atan chuan a in leh ropuina a ni kumkhua tawh dawn.

Highbury kha Wenger tan inpui a ni a, mikhual tan hmun ralṭi a ni. Stadium lian leh changkang ni lo mah se ropuina tam tak a sualchhuahna hmun a ni. A tan chuan a hlu a, a mit aṭang chuan khawvel khelmual dang zawng zawng aiin a mawiin a nalh zawk hial awm e.

Emirates Stadium an sak theih nan tha thawhtu pawimawh chu Wenger bawk a ni. Manager a ni a, team a enkawl a ni satliah lo, club pumpui a chawikang tih pawhin a sawi theih ang. Mahse, a chhuah hma leh chhuah hnuah stadium kawtah a lim (statue) din a la ni lo a, a thawhchhuah phu khawp chawimawina leh zahna a la hmu lo!

Arsenal thuneitu lam hian milim din an ngaihsak lo emaw, an theihnghilh palh em ni? Ni lo, an theihnghilh lo. Wenger-a siam len striker Thierry Henry-a goal lawm lai lim chu Emirates Stadium kiangah an din luah lawi si! Club ropui an nih theih nana sulsutu Wenger erawh hai der a ni rih.

FIFA chief of global development atan Arsene Wenger hi an ruat tawh a, team enkawl tawh lo mah se football khawvel erawh a la 

mangṭha vek lo. Arsenal a chuahsan dawn khan, "Sulhnu avangin ka lawm, tunah chuan mangṭha tih a hun ta," tiin sawi tawh mah se North London club erawh a la mangṭha pumhlum bik lo.

Arsenal coaching leh playing staff-te inthuamna anga inthuam chungin exercise a la ṭhin a, a taksa chu chhuak fel tawh mah se a rilruah erawh a la thi kim bik lo. A fanu Lea tlawhin London khawpuiah a la thlawk lut fo bawk.

Wenger-a fanu Lea hian Cambridge aṭangin veterinary science a zir chhuak a, London khawpuiah hian postgraduate a tih chhunzawm. French manager-in a ngainat ber Italian restaurant Cocorico-ah an pafa hian zanriah an la eidun ṭhin.

A ṭhian hnai tak Bob Wilson chuan, "Eng tik niah nge Arsene Wenger hi Emirates Stadium-ah a kir leh dawn chu tumahin an hre lo. Arsene-a'n Arsenal a hmangaihna hi a la reh lo a, a hun chu hre lo mah ila engtik niah emaw chuan a la thleng leh ngei ang tih ka beisei," a ti.

English football-a Arsene Wrenger chhawp chhuaktu chu David Dein a ni. Dien-a'n Wenger a lakluh tirh khan 'Tu nge Wenger?' tih chu mipui leh media zawhna a ni. Season 22 vel a cham hnuah erawh a hming inzawh nawn a ngai tawh lo.

Arsenal aṭanga Wenger a chhuah dawn khan club vice chairman hlui David Dein chuan, "Vana arsi lakbo ang mai a ni" tiin a sawi hial a, an manager ropui sulhnu leh hnathawh zawng zawng hrechiangtu a nih avangin thinlung takin a ui ang tih pawh a chiang.

A hming, nihna leh thil tih zawng zawng avangin Wenger chu tu nge a nih inzawh a ngai tawh lo. Tuna zawhna awm chu 'Ti nge Wenger?' tih a ni ta zawk. Eng vangin nge Emirates Stadium lam hawia ke a chheh duh tawh miah loh a; London Colney pawh ngaihna tlemte tal a nei lo em ni? tih chu zawhna a ni.

Wenger-a ṭhian pakhat, a hming tarlan loh chuan, "Mi tlemte hmuh duh loh a nei," tiin Arsenal lama a kir loh chhan hi a sawi. Arsene hian, "Emirates Stadium-ah ka kir leh ang maw? Arsenal ka chhuahsan fel tawh, ka thutlukna siam tawh hi keimah ngei pawh ka inhrilh nawn fo ṭhin," tiin a lo sawi tawh bawk si, a ropuina hmunah hian mikhual ni tur chauh pawhin a kir tawh lo mai thei.

Arsene Wenger kha Arsenal siam liantu a nihzia chu inhrilh nawn a ngai lo. Thuneihna sang tak pek a ni a, player lakluh leh hralh thlengin a thu hle. Amah thlaktu tur pawh a duh a thlang dawn tih thlenga sawi a awm hman.

Kum 2017 May thla tawp khan season hnih daih contract a ziak a, a hun hnuhnung lamah hian result a neih ṭhat tawk loh avangin sawisel a hlawh a, fans zingah pawh chhuak tura nawrtu an tam; London khawpuia 'Wenger Out' tia kawngzawh pawh an awm hial a nih kha.

Contract thar a ziah aṭanga season khat a liam hnuah Emirates Stadium aṭanga a chhuah tur thu puan a ni. Manager ropui, contract neih lai zah em em ṭhin, club ropui Real Madrid pawhin an sawm chhuah zawh loh Wenger chu ban a ni!

"Inpekna pumhlum leh thiamna zawng zawng nen ka enkawl," tiin Gunners a chhuahsan tur thu hi a sawi. Club neitu Stan Kroenke chuan, "Arsenal kan neih chhan chu Arsene hi a ni, tun hi kan hun thim leh hrehawm ber a ni," tiin a sawi ve bawk.

American sumdawng hausa, football aia thil dang hrang hrang ngaihtuah ṭhin Stan-a hian a rilru tak tak a sawi em tih chu hriatsak theih a ni lo. Wenger hian player bakah a mimal contract a ngai pawimawh ṭhin, sawiselna leh diriamna nasa tak karah pawh nghet takin a ding ṭhin.

A tawpah erawh contract hmang zo loin a chhuak ta si, a duhthlanna ngeia chhuak nge a nih a, an hnawl zawk tih chu zawhna lian tak a ni. Khatih laia Arsenal chief executive Ivan Gazidis khan thuneihna sang tak a nei a, mahse ani pawh Wenger chhuah aṭanga thla li hnu lekah AC Milan lamah a kal leh ta zawk.

Wenger chhuah chhan kha chiang fek fawka tarlan a ni lo a, club lamin 'a chhuak dawn' tih an sawi bak ani pawhin sawi a nei hran lo, zawhna chhan loha awm mek chu a ni. Hun rei tak chhung a enkawl, nuam a tih em emna ṭhin hmuna a kir duh ta miah lo hian ngaihtuah erawh a ti thui.

Arsenal chanchin an sawi apianga an lam hmaih theih loh chu hneh loh nei loa an champion ṭum kha a ni. Arsene Wenger kaihhruaina hnuaiah 2003-04 season Premier League-ah khan tlawm nei loin an champion a, club dang zingah ti ve thei an la awm lo.

Kuminah Jurgen Klopp-a enkawl Liverpool chu league-ah vung takin an kal a, 'Invincible' an ni ve mai dawnin a lang hman. Mahse, February thla khan Watford lakah 3-0 in an tlawm, record ropui chu nihrual theihna hun nei mah se an bawhpelh.

Wenger chuan, "Hneh loh nei loa champion thei awmchhun chu keimahni chauh kha ni reng ila ka duh. Liverpool inkhel a ropui a, season kal laiah hian kan tih ang kha an rawn ti thei mai dawn niin a lang hman.

"Amaherawhchu kha-tianga kal tluan kha chu thil awlsam a ni lo. Reds chak lo kha lawmpui chi an ni hran lo, chutih rualinVicarage Road-a inkhel a zawh chiah kha chuan Arsenal ṭantute hnen aṭangin message ka dawng hnem hle," a ti.

Division 1: 1987–88

Coupe de France: 1990–91

Emperor's Cup: 1995

Japanese Super Cup: 1996

Premier League: 1997–98, 2001–02, 2003–04

FA Cup: 1997–98, 2001–02, 2002–03, 2004–05, 2013–14, 2014–15, 2016–17

FA Charity/Community Shield: 1998, 1999, 2002, 2004, 2014, 2015, 2017

1.    J. League Manager of the Year: 1995

2.    Onze d'Or Coach of The Year: 2000, 2002, 2003, 2004

3.    Premier League Manager of the Season: 1997–98, 2001–02, 2003–04

4.    LMA Manager of the Year: 2001–02, 2003–04

5.    BBC Sports Personality of the Year Coach Award: 2002, 2004

6.    London Football Awards – Outstanding Contribution to a London Club: 2015

7.    World Manager of the Year: 1998

8.    FWA Tribute Award: 2005

9.    English Football Hall of Fame: 2006

10.    France Football Manager of the Year: 2008

11.    IFFHS World Coach of the Decade: 2001–2010

12.    Facebook FA Premier League Manager of the Year: 2014–15

13.    Premier League Manager of the Month: March 1998, April 1998, October 2000, April 2002, September 2002, August 2003, February 2004, August 2004, September 2007, December 2007, February 2011, February 2012, September 2013, March 2015, October 2015

14.    France Football 32nd Greatest Manager of All Time: 2019

15.    World Soccer 36th Greatest Manager of All Time: 2013

16.    Laureus Lifetime Achievement Award: 2019

Hmingpum                Arsene Charles Ernest Wenger

Pianni leh thla            22 October 1949 (Kum 70)

Pianna hmun            Strasbourg, France

San zawng                6 ft 3 in (1.91 m)

Playing position        Midfielder

Team enkawl            Nancy, Monaco, Nagoya Grampus Eight, Arsenal