Miami atan ka inpeih - Del Potro

Juan Martin Del Potro chuan tun hnaia a chet fuh chhoh avangin a hlim thu a sawi. Argentine tlangval hian Miami Masters atan a inpeih thu a sawi bawk.

Del Potro hian Roger Federer lakah match point vawi thum a inchhanhim hnuah Indian Wells Masters title a la a, player huaisen a nih zia lantir nan fiahna hautak a paltlang.

Tun dinhmunah hliam vangin Rafael Nadal, Novak Djokovic leh Andy Murray te an inkhel thei lo mek, world number 1 Federer tana hnawksak ber tur chu Del Potro hi a ni.

Mexican Open leh Indian Wells champion zawn thei Del Potro chuan, "Harsa taka hnehna ka chan avangin hlim hun a ni a, tunah chuan Miami atana inpeih a hun chho leh tawh bawk. Tournament ka ngainat berte zinga mi a ni a, a hmuna awm te hian ka khelh dan phung an ngaina ṭhin hle. Kuminah pawh hian mipui beisei ang taka ka khelh theih ka beisei," a ti.

Kum 26 mi Del Potro hi 2014 hnua a vawi khat nan Janaury thla khan world number 10 huangah a inhlangkai ve leh chiah, hliam vanga zai a tawh fo a avangin world number 1,045-ah a tla hniam hman a ni.

World number 6 Del Potro chuan, "Number hi ka ngaih pawimawh ber a ni lo a, a pawimawh zawk chu nomawi chawi zawk a ni. Tunah hian inkhel tura harsatna ka nei lo, hmasawn zel chungin engtiang chena thui nge ka thlen theih hi hriat ka duh," tiin a sawi.