Indian football : Transfer bazar a lûn; sawi a tam

India rama league pahnih I League leh Indian Super League season hman zawh a ni tawh a, Minerva Punjab leh Chennaiyin FC an champion - Indian foot­ball-a hmabak awmchhun chu Super Cup chiah a ni tawh.

Indian club ten season hman zawh a nih rualin season thar an thlir ṭan der a, Indian football bazar a lun hle. Season dang zawng aiin Indian football-ah sum a tam tawh a, hei vang hian player inchuh pawh season dang zawng aiin a na.

Tun dinhmuna transfer bazar-a hming langsar ber chu Bengaluru FC striker chhuan­vawr Miku a ni a, Venezuela international hian Chinese Super League aṭangin rimtu a nei.

Miku an ngam huai
Venezuela tan vawi 51 inlana goal 11 khung thei Miku-a'n Benga­luru tana a season hmasa berah match 20 khelin goal 15 a khung. Getafe striker hlui chet ṭhatnain China ram a thleng a, amah duhtu langsar zingah Atle­tico Madrid forward hlui Yannick Carrasco khelhna Da­lian Yifang chuan pound mak­taduai li velin an ngam nia sawi a ni.

Kum 32 mi striker hian, "China aṭang­in sawmna ka hmu a, tuna ka hlawh let ruk aṭanga sarih vel min pek an huam a ni. Ka cham zel an duh chuan Bengaluru hian hmalak dan an ngaihtuah ve a ṭul ang," tiin hlawh sang zawk a phut a, season khatah nuai 322 hlawhin kum khat contract a la nei.

Bengaluru chief technical officer Mandar Tamhane erawh­­in an striker hi chhuahtir tumna an neih loh thu sawiin, "China aṭangin min dawrtu an la awm lo a, September kha chuan Brazilian Serie A aṭangin sawmna a hmu nual. Mahse kan hnena awm reng turin kan duh a, kan duhna hi a la danglam lo," a ti - Bangalore club hian season zawh hma khan Edu Gar­cia chu Chinese League One club Zhejiang FC hnenah pound maktaduai 1.05 in an lo hralh tawh.

Gregory a nghet
ISL-a a season khatnaah John Gregory a champion nghal a, Aston Villa boss hlui hian Chennaiyin FC enkawl chhunzawm turin kum khat dang atan contract a ziak. English manager chuan, "Chennaiyin FC ka enkawl thei hi ka lawm takzet a, ka tan chuan zinkawng hlimawm tak a ni," a ti.

Aston Villa a enkawl laia FA Cup final a luh baka UEFA Cup khelhpuitu coach hi English coach zinga ISL nomawi chawi hmasa ber a ni a, QPR pawh lo enkawl tawh coach chuan, "Kum 20 hnuah pawh English coach ISL nomawi chawi awmchhun ka nih chuan ka hlim ang," a ti.

John hi English mi zinga Indian Super League nomawi chawi hmasa ber a nih rualin Indian football-a coach cham­pion hmasa ber erawh a ni lo - 2013-14 season khan Ashley Westwood chuan I League-a a season hmasa berah Bengaluru FC a champion pui nghal.

Maha club an buai
ISL-ah Maharashtra club pahnih Pune City FC leh Mum­bai City an awm a, Maha club an buai tih hian club inrelbawlna lam ni loin transfer bazar-a an buaina zawk a ni. Pune City-in semifinal an khel a, season tharah a aia ṭha zawka chet an tum tih pholan nan East Bengal aṭangin Nikhil Poojari an lalut a, Bengaluru forward Alwyn George chu inbiakna an neihpui mek bawk.

Mumbai City an awm mai mai bik lo. Jamshedpur FC tana khel ṭha tak Souvik Ghosh an lalut a, kum 25 mi left back hian I League-ah Mohun Bagan tan a khel tawh a, Delhi Dynamos leh NorthEast United tan ISL-ah tawnrhiat a nei tawh bawk.

Hetihlai hian Raynier Fer­nandes chuan Mumbai club hi zawm turin an inbe mek bawk. Kum 22 mi midfielder hian season hman zawh takah khan Mohun Bagan tan league-ah match 17 khelin player pawimawh pawl a ni a, ISL-ah a la inlan ngai lo.

ATK tan Jayesh
Aizawl FC forward hlui Jayesh Rane chuan ATK tan season thum dang khelh chhunzawm turin contract thar a ziak a, ISL season hmasa pathumah khan Chennaiyin FC tan a lo khel tawh. Jayesh hian kum khatah nuai 49 a hlawh mek a, ATK hian a hlawh an pun ngeiin a rinawm.

ATK hian season thar atan Aizawl FC goalkeeper Avilash Paul an lalut bawk. Kum 22 mi keeper hi Mizo club tan keeper rinrawl a ni a, season duhawm tak a hman avangin ISL club-te chil a ti put - a tawpah Kolkata club-in an chang dawn ta a ni. East Bengal keeper hlui hian Mizo club tan Super Cup leh AFC Cup a la khel vek dawn a, ISL ṭan dawnah ATK hi a zawm ang.

Kolkata club tan tun season-ah Debjit Majumder-a'n beisei a phak loh avangin Avilash bakah Arindam Bhattacharya an lalut bawk a, Mumbai City goalkeeper hlui hian kum hnih chhung atan contract a ziak.

JFC lamah Dhana
Jerry Lalrinzuala a lan hma chuan Chennaiyin FC-ah Dhanachandra Singh chu player pawimawh a ni ṭhin. Mahse, season hmasaah Dhana a inhliam a, Manipur defender awm loh hlanin Jerry-a'n a hming a chher - Bethlehem rawlthar awm hnuah Dhana-a'n hmun pawimawh a chang phak leh tawh lo a, South Indian club chhuahsanin Jamshedpur FC a zawm.

Manipur defender bakah hian Pratik Chowdhary chuan Tata Steel club hi a zawm bawk. Pratik hian tuna JFC coach Steve Coppell enkawlna hnuaiah Kerala Blasters tan a lo khel tawh a, a coach hlui nen an thawkdun leh dawn ta a ni.

Indian player langsar Lenny Rodri­gues chuan FC Goa tana khel turin contract a ziak bawk. Lenny hian season hman zawh takah Bengaluru tan match 17 khelin goal khat a khung a, assist vawi khat a nei bawk. ISL season hmasa pathum kha Pune City tan a khel a, 2016-a loan-a Bengaluru a pan hmain Dempo SC leh Mohun Bagan-ah a khel a, tun ISL ṭan dawn khan BFC hian player draft aṭangin an chang a, tunah erawh a chhuak dawn ta.