Champion thei pathum kan awm - Wolff

Formula 1 team hlun Mercedes boss Toto Wolff chuan season tharah cham­pion a harsat tur thu a sawi a, Ferrari leh Red Bull te nen an inel tur thu a sawi tel bawk.

Tun season intlansiak hmasa ber chu Pathianni hian Australia-ah neih a ni dawn a, champion lai Lewis Hamilton chu rinkai ber a ni a; a team ten a chungah rinna an nghat ngam bawk. Mahse, driver dang ṭha tak tak an tam avangin champion chiang saa dah theih a ni bik lo.

A zawna season li chhung team champion ni thei Mer­cedes boss Wolff chuan, "Tun dinhmunah chuan kan car chung­changah kan driver-te an lungawi hle a, intlansiakna boruak sang leh hautak neih hunah engtiang chiah nge a nih dawn tih erawh hriat a la ni lo," tiin a ṭawng fimkhur hle.

Wolff chuan sawi zawmin, "Nikuma kan champion kha chu a liam tawh, inelnaah chuan nimina hnehna changtu kha vawiinah a chak leh kher lo. Season thar kan hman tur hi Mount Everest lawn tur ang a ni, kum dangah lawn chhuak tawh ṭhin mah ila season thar atan chuan tlang bul ṭhutah kan awm mek," tiin an hlawhtlinna chan tawh chu chhawr nawn theih a nih loh thu a sawi.

Season thara kan hmuh tur zingah Britain driver Hamilton leh Ferrari duhlai Sebastian Vettel te hi vawi li champion thei an ni a, Argentine driver Juan Manuel Fangio-a record an nihrual tawh, sulhnu nei ṭha ber Michael Schumacher erawh vawi thumin an phak lo thung.