Argentina tan Rojo leh Romero
Football thiam ram pahnih Argentina leh Italy ten Zirtawpni zanah friendly match an khel dawn a, South American ram tan hian Manchester United tana inlan tam lo Marcos Rojo leh Sergio Romero te koh an ni.
Ram pahnih te inkhelhna tur hi Etihad Stadium niin, Thawhṭanni khan Argentina hian Manchester City training-na hmunah inbuatsaihna hun an hmang tawh. Lionel Messi-a'n training hmasa ber hi zawm lo mah se Italy lakah erawh a inlan tura ngaih a ni thung.
Argentina coach Jorge Sampaoli-a'n Chinese Super League lama hun hmang mek Javier Mascherano a ko a, Barcelona midfidelder hlui hi a World Cup hnuhnung ber khel turin a inbuatsaih mek.
Qualifier an khelh laia koh hlawh lo Juventus striker Gonzalo Higuain hming a lang tawh a, Premier League champion ni mai tur Manchester City player pawimawh Sergio Aguero leh Nicolas Otamendi te tan Italy an hmachhawnna tur khelmual hi an hman thiam sa a ni.
Argentina khingpui tur Italy hian kum 1958 hnua a vawi khat nan World Cup an khel phak lo, senior team enkawl tur hian coach nghet an la nei lo a, junior team enkawltu Luigi Di Biagio-a'n a enkawl lailawk.
Italy squad aṭangin Giorgio Chiellini chu malpui na vangin a inhnukdawk. Juventus defender hi kar tawpa Spal nen an inhnehtawk ṭumin hliam vanga thlak a ni. Ram tana match 96 inlan tawh Chiellini hian Argentina bakah England pawh a hmachhawn thei lo ang.