September thlaah French Open

Tennis inelna zinga clay court tournament lian ber French Open chu a hun pangngaiah khelh theih a ni dawn lo a, an rama tennis thuneitu sang French Tennis Federation chuan September thlaa neih tur a nih thu an puang.

Roland Garros 2020 hi rua-hman lawk dan chuan May 24 aṭanga June 7 chhunga khelh tura tih a ni. Mahse, coronavirus vangin infiamna khawvel a buai a, tun dinhmunah tennis inelna chu a rei lo berah pawh April 20 thleng khelh loh tura tih a ni.

Ruahmanna tharah chuan clay court inelna lian hi September 20 aṭanga October 4 chhunga neih tura tih a ni, hard court inelna ngaihhlut US Open khelh zawh aṭanga chawlhkar hnihnaah an khel zui dawn.

French Open khelh hun sawn a nih avangin inelna ṭhenkhat chu a nghawng ngei dawn a, harsatna thleng thei hre mah se inelna ṭhulh tawp ai chuan a khelh hram dan an ngaihtuah ta zawk niin a lang.

'

Thuchhuah siamin French Tennis Federation (FFT) chuan, "Tournamernt buatsaihtu leh inhnamhnawih thei dang zawng zawngte himna leh hriselna kan ngai pawimawh. Inelna tak neih ṭan hmain qualifier khelh a ngai a, chutiang hun atan chuan tuna kan dinhmun hi chu a inpeih lo.

"Hetiang ang thutlukna danglam tak siam tur hi chuan keini lam pawh kan inring hman bik lo, kar hmasa aṭang khan ngun takin kan lo ngaihtuah tawh a, kan zavaia ṭhat tlan theihna tur nia kan hriat chu kan kaltlang pui," an ti.

French Open hi a hmuna en tumin fans tam tak chuan ticket an lo la lawk tawh. FFT chuan, "Ticket la sa tawhte chu an duh a nih chuan an thleng kir leh thei ang a, inelna hun sawn hnua an ring tlang duh a nih pawhin a theih tho ang," tiin an sawi.

International Tennis Federation (ITF) hnuaiah hian mipa tennis thuneitu sang Association of Tennis Professionals (ATP) leh hmeichhe inelna lama thuneitu Women's Tennis Association (WTA) an awm, anni hian ITF kaihhruaina hnuaiah anmahniin ro an inrel hran ṭhin.

Season khat chhungin inelna lian bik 'Grand Slam' pali a awm ṭhin - Australian Open, French Open, Wimbledon leh US Open te an ni. Inelna dang chu chawlhkar khat chhunga khelh zawh a ni a, major tournament erawh chawlhkar hnih chhung a ni thung.

US Open hi Grand Slam inelna zinga hnuhnung ber a ni, tun season atan chuan French Open hmangin an khat zawk dawn ta niin a lang. Wimbledon leh US Open ngei pawh a hun sawn theih a la ni thung a, thu chiang sawi faktheih a la ni lo.

Tuna French Open khelh hun sawn pawh hian Laver Cup bakah Asia ram season tawp lama tournament an khelh ṭhin ṭhenkhat chu a nghawng dawn a, player ṭhenkhat chuan na takin an sawisel zui nghal a ni.

Kum 1891 aṭanga khelh ṭan French Open hi Stade Roland-Garros, Paris-ah khelh ṭhin a ni a, an khelhna hmun hi ram danga tennis legend hming chawia an phuah ang lo takin, Indopui 1 hun laia French pilot Roland Garros hming chawia phuah a ni. 

Australian Open (hard), Wimbledon (grass) leh US Open (hard) te ang lo takin 'clay court' ah an khel ṭhin a, tournament dangte nena khaikhinin ball kal dan a danglam avangin player ṭhenkhat chu an hlawhchham chiang thei hle.

Clay court-ah chuan ball a kal muang a, a sawt sang thung. Ball vaw vir thiam leh tlan chak deuhte tan hmun duhthusam a ni a, a hnung lam (base line) aṭanga ball vaw vir thiam Rafael Nadal tan chuan vanram tlafual a nih laiin attacking game khel ṭhin Roger Federer te tan chuan hmun ralṭi a ni thung.

Inelna hiam zawk nena sawi chuan French Open chauh hi clay court-a an khelh a ni lo; Monte Carlo, Italian Open leh Barcelona Open te hi a langsar leh Roland Garros inbuatsaih nana an hman ṭhin a ni. Kuminah chuan inbuatsaihna tournament mumal bik awm loin an khelh a ngai dawn.