Atletico-ah Griezmann a kir Barca an thawl!

European football transfer tawp zanah rin loh tak chanchinin min ṭhawng a, chu chu Antoine Griezmann-a'n Barcelona chhuahsana Atletico Madrid loan-a a pan thu a ni!

Season hmasa khan tun nipuiah Barcelona-in Lionel Messi leh Griezmann an chân tur thu sawi ila, mi tam tak tan nuihzabur kan ni ang a, kan thusawi awihtu chu khawvar lam arsi ang pharh an ni ngei ang.

Mahse, "Football-ah chuan thleng thei lo a awm lo," tia sawi ṭhin kha khelmual chhung atan chauh a ni lo a, khelmual pawnah pawh a dikna kan hmu zel.

Barcelona-in Paris St-Germain lakah Messi an chân a, Atletico Madrid lakah Griezmann an chân leh ta - French forward thlak nana an lakluh chu Sevilla duh loh Luuk de Jong a ni!

Hello Griezmann
Kum 30 mi Griezmann hian July 2019 khan Atletico Madrid chhuahsanin Barcelona a zawm a, Catalan club hian a release clause-a inziak angin euro maktaduai 120 an seng.

Mahse, France tana World Cup nomawi chawi thei forward hian Barcelona-ah beisei a phak lo a, Catalan club tan inelna hrang hrangah match 102 khelin goal 35 chiah a khung a, Copa del Rey-ah chiah nomawi an chawi!

Atletico-ah khan match 257 khelin goal 133 a khungsak a, assist vawi 50 a nei bawk - a chhuahsan hnuah Atletico-in season hmasa khan league nomawi an chawi thung a, Griezmann-a vanduai takzet.

Griezmann hian season khat chhung atan Atletico hi loan-in a zawm phawt a, loan zawhah a club hlui hian a nghetin euro maktaduai 40-in an lei thei ang - Atletico an hlawk hle.

Atletico & Barca
Season hmasa ṭan dawn khan Barcelona chuan an striker chhuanvawr Luis Suarez chu Atletico lamah hian an lo kal tir tawh a, Uruguayan forward hian league match 32-ah goal 21 khungin a team hi La Liga-ah a champion pui.

Hei vang tak hian Barcelona thutlukna hian mak tih a hlawh - season hmasaah an elpui lamah Suarez an chhuahtir a, nomawi an chawi nan player thawhhlawk a ni. Tun season-ah an elpui Atletico-ah bawk Griezmann an kaltir a, dem an hlawh hle.

Barcelona hian Griezmann thlaktu tur an lalut ve nghal a, a hming chu Luuk de Jong a ni! Sevilla-a khel phak mumal lo striker hian season hmasa khan league match 34 khelin goal li chiah a khung.

Match 34 zinga vawi 14-ah chiah bul a ṭan a, a bak zawng hi bench aṭangin a lut. Barca hi season khat chhung atan loan-in a zawm a, a ngheta lakluh theihna dan Catalan club hian an nei tel.

A har a ni
Griezmann chhuahtir a, Luuk de Jong lakluh hi Barca fans tan chanchin lawmawm a ni lo - Catalan club hian tlarhmaah Memphis Depay, Ousmane Dembélé, Martin Braithwaite, Ansu Fati leh Sergio Agüero duhthlan tur an nei tihna a ni ta a, Messi, Suarez, Neymar (MSN) nei ṭhin tan chuan lawm taka kut ben a har ang.

President atana Joan Laporta-a campaign lai khan Messi a chelh tur thu uar takin a sawi a, kha vanga President-ah pawh tlingah tam takin an ngai. Mahse, Messi chelh loin a chân a, Griezmann a chhuak leh ta bawk. Fan-ten he thil thleng tur hi hmu lawk se, Laporta hi President-ah a tling kher lo ang.

Mahse, sumah Barcelona an talbuai tih chu transfer bazarin chiang takin min hmuhtir a, tun nipui transfer-ah Catalan club hian player 11 zet an chhuahtir a, transfer aṭanga an sum hmuh hi euro maktaduai 76.5 a tling.

Heti chung hian chhuak tur anga sawi Miralem Pjanic, Philippe Coutinho leh Samuel Umtiti ten duhtu club an nei rih loa ngaih a ni a, anni hi chhuak ngat phei se chuan an thawl hawk thei ang - Sergio Busquets leh Jordi Alba te chuan an hlawh tihhniam an remti tawh bawk.

A tawpah
Catalan club hian January 2019-a Real Betis nena an inlei ṭawm Emerson Royal chu Betis-ah season hnih leh a chanve a khelh hnuin tun nipuiah a nghetin an la let a, Emerson an neih pum hlum theih nan hian euro maktaduai kua an seng.

Mahse, Barca-in tun nipuia an lakluh ve chauh Emerson pawh an hralh a, Tottenham Hotspur chu euro maktaduai 30-in a zawm. Laporta-a'n, "A release clause chu euro maktaduai 300 a ni a, kan hnenah rei tak a cham theih kan beisei," tia Emerson chungchang a sawi nen kha chuan a inpersan ta hle.

Hetihlai hian Spurs defender Serge Aurier chuan a contract titawpin London club a chhuahsan ve thung. Kum 2017 khan PSG aṭangin Spurs hi pound maktaduai 23-in a zawm a, match 110 khel hman mah se tun hnaiah a tla tlum lo a, Emerson a luh leh tak bawk avangin a chhuak.

Transfer tawp niah Barca player Ilaix Moriba chuan kum nga chhung atan RB Leipzig chu euro maktaduai 16-in a zawm bawk a, kum 18 mi midfielder man zat hi euro maktaduai ruk vela san belh thei a ni a, Leipzig hian an hralh chuan Barca-in 10% an chang ve bawk ang - an theih ang angin Barca-in sum an dap zel.