Sum hmang hnem ber Arsenal

Football nipui bazar neih zawh takah Arsenal chu sum hmang hnem ber an ni. North London club hian player thar paruk lakluh nan pound maktaduai 145.2 zet an hmang a, an player neihsa ṭhenkhat an chhuak bawk.

Bazar tawp niah Gunners hian Japanese defender Takehiro Tomiyasu chu Bologna aṭangin pound maktaduai 16 sengin an lalut a, hetih lai hian Hector Bellerin erawh Real Betis lamah loan hmangin an chhuahtir thung.

Sum an hmang
Arsene Wenger khan player lei nan sum a hmang tam ngai meuh lo, team ti chak tur leh chher hriam theih tur nia a hriatte man tlawm zawkin a lakhawm ṭhin a, a sang pali zinga awm tawk vel chuan season an zo leh mai thin.

Wenger chhuah hnuah Gunners hian sum hmang tam ta deuh mah se beisei ang result erawh an la nei thei lo. Mikel Arteta-a'n Ben White (£50m), Martin Odegaard (£30m), Aaron Ramsdale (£24m), Takehiro Tomiyasu (£16m), Nuno Tavares (£8m) leh Albert Sambi Lokonga (£17.2m) te a la lut.

Premier League club chauh ni loin European league lian zingah Arsenal hi tun nipui bazar bika sum hmang hnem ber an ni a, an league match hmasa pathuma an tlawm vek avangin an sum hman hi a takin a la thawk lo niin a lang.

A tawpah Tomiyasu
Arsenal ṭantuten Bellerin lakah beisei an nei sang ṭhin, mahse an beisei ang an hmu chhuak ta lo. Spanish defender hi club hrang hrang nen sawizawm a nih hnuah season khat chhung loan hmangin Betis a zawm, season hnih daih contract la nei mah se an ram club-ah a luh ngheh a rinawm.

Bellerin a hmun ruak luah turin Tomiyasu an nei thung. Kum 22 mi defender hi tlarhnungah chuan a dinglam sir leh a laia khel kawp thei a ni. Season hmasa khan Serie A match 31 khelin Bologna player pawimawh a ni phak.

Arteta chuan, "Takehiro hi tharum nghah tak mai a ni a, club leh ram tan tawnhriat a nei ṭha tawh hle," a ti. 6ft 2in a sang defender hi Calum Chambers leh Cedric Soares te tan elpui hautak tur a ni ang.

Beisei phak lo
Barcelona academy aṭangin 2011 khan Arsenal chuan Bellerin an la, kum naupang tak ni chungin senior team tan a khel phak a, nakin zelah chuan captain tur hiala an rin leh vulh a ni - mahse, 2019 khan na takin a khup a hliam a, a hnuah beisei angin a khel chhuak tawh lo.

Kum 26 mi defender hian North London club tan hian match 239 a khel a, FA Cup vawi hnih a champion pui. A khup a hliam hnuah rinrawl a ni phak ta lo a, season kal laiah phei chuan league match vawi thum an khelh tawhah a la inlan lo a ni.

Arsenal chuan thu chhuah siamin, "Hector hi Real Betis nen season ṭha tak hmang turin duhsakna kan hlan," an ti a, loan hmanga a chhuah danah hian a ngheta lei zui theihna a awm thu an sawi lang tel bawk.

Cham leh chhuak
Inkhelh tam duh vangin Ainsley Maitland-Niles-a'n Arsenal chhuahsan a duh a, loan hmangin Everton a zawm dawn ni pawhin a lang hman. Mahse, Gunners lamin an chhuah phal lo, manager Arteta nen an inbiak hnuah a cham dawn.

England international Mait-land-Niles hian inkhelhna hmun a chan ngheh theih loh avangin chhuah a lo duh tawh ṭhin, season hmasa pawh khan West Brom tan loan hmangin a khel tawh, tunah erawh lungsi lo tak chungin hmun chan tuma a beih a ngai dawn.

Reiss Nelson erawh Dutch club Feyenoord lamah loan-in a kal a, nikum September thla lawka an lakluh keeper Alex Runarsson pawh Danish Superliga club FC Nordsjaelland-ah inkhelh phak beiseiin a chhuak ve bawk.