Hnehna nen Djokovic a lo kir

Novak Djokovic chuan Grand Slam title pali kawl kim ngei a tum. Serbian tlangval hian US Open a match hmasa berah qualifier paltlanga inlan Holger Rune chu set li an khelh hnuin a hneh.

Nimin zing Flushing Meadows, New York-a inkhelah Djokovic hian darkar hnih leh minute 15 an inbeih hnuin 6-1, 6-7 (5-7), 6-2, 6-1 in hnehna a chang - kum 18 mi Rune tan Grand Slam vawi khat khelhna a ni a, world number 1 a tum nghal miau avangin a tan kawng a inhawng lo.

Kirlehna chu
Season hmasa US Open-ah khan Djokovic hi champion tura rinkai a ni, mahse line judge ball a vuak per avangin an hnawl (disqualify) a, a tihpalh a nih thu sawi mah se ngaihhnathiamna a awm thei chuang lo.

Kuminah Grand Slam hmasa pathuma champion vek chungin New York khawpuiah Djokovic a inlar leh. Tokyo 2020 hnua tournament a khelh leh hmasak ber a nih avangin inbuatsaihna erawh a nei ṭha tawk lo, hriat hlawh lo lakah set a hloh nghal.

World number 1 Djokovic chuan, "Holger hi player chhuak thar ṭha zinga mi a ni a, a tlang lo erawh ka tawrh pui. Ka khelh ṭhat ber ni chu a ni lo, amaherawhchu hun pawimawh laia ka che fuh kha a lawmawm," tiin a sawi.

Zverev a chak
Champion tura rinkai zinga mi Alexander Zverev pawhin hnehna a chang. Seeded palina Zverev hian tualchhung tlangval Sam Querrey chu darkar khat leh minute 40 chhung lekin 6-4, 7-5, 6-2 in a hneh.

German tlangval hian hlawhtlinna hrang hrang a lo chang tawh ṭhin - Grand Slam title tak erawh a la chawi lo. Tokyo 2020-ah Djokovic a hneh thei a, a champion zui bawk avangin tun ṭumah hian major title lak beiseina pawh a nei sang hle.

Inkhel dangah player langsar - Denis Shapovalov, Matteo Berrettini leh Kei Nishikori te an chak vek. Mahse, seeded pakuana chang phak Pablo Carreno Busta erawh tualchhung mi Maxime Cressy lakah 5-7, 4-6, 6-1, 6-4, 7-6 (9-7) in a tlawm.